El Teatru Xovellanos diz que’l boicó al FICXixón zarra puertes a Carballo a la hora de programar

María Teresa Sánchez, xerente del Teatru Xovellanos, reconoció que Nacho Carballo ta alcontrando puertes zarraes a la hora de programar el FICXixón d’esti añu. Los cineastes anunciaron un boicó al certame tres la destitución de José Luis Cienfuegos.
 
Tamién atopa problemes a la hora d’algamar financiación, anque la organización del Festival Internacional de Cine de Xixón (FICXixón) confía en caltener el mesmu presupuestu, incluyida la subvención del Ministeriu de Cultura, de 70.000 euros, que se ta negociando nestos momentos. Sánchez destacó, nesi sen, que se mantién, anque "recortada", la del Gobiernu d’Asturies.
 
 "Él alcontróse con puertes zarraes, y a elles ta llamando", insistió la responsable del Xovellanos sobre les xestiones del direutor nuevu del certame, al tiempu qu'indicó qu'entiende que son munchos los años nos que tuvo al mandu d'una mesma persona y agora, hasta que nun se conoza el proyectu, "nun sabes si te pues inclinar hacia él", apuntó. Nel casu de los patrocinadores, adelantó que Caxastur confirmó la continuidá del so apoyu al certame, mentes que, del restu, dalgunos sí siguen pero otros tán nel aire, en parte pola crisis y los recortes y en parte pol boicó. Sicasí, apuntó que Carballo ta trabayando nello y confió en contar colos 858.000 euros del añu pasáu.
 
Calcó en qu'en toles empreses, tanto privaes como públiques, tán ellaborándose unos presupuestos "mui xustos", pa lo qu'apostó por mostrar que'l proyeutu ye "real", y nél va haber películes y actividaes. De toes formes, anque la partida presupuestaria fuera menor, siguirán trabayando, dixo la xerente del Xovellanos. Con too, señaló qu’espera poder dar un adelantu del so conteníu na primer quincena de mayu, lo mesmo que de les actividaes paraleles que van entamase con motivu del cincuenta aniversariu del eventu. "D’una forma callada y silenciosa, pero ta trabayando", aseguró del direutor del FICXixón, pa depués avanzar que se caltienen les mesmes seiciones y s’añade dalguna más, como la d'animación.
 
Pela so parte, el conceyal d'Educación, Cultura, Mocedá y Festexos, Carlos Rubiera, nun consideró tan importante'l tema del boicó y apuntó que foi "más testimonial que real", anque añadió qu'hai dellos casos nos que se caltién y, n'otros, yá se ta confirmando la participación de los convidaos. Sánchez y Rubiera fixeron estes declaraciones sobre’l FICXixón na presentación de la Feria del Llibru de Xixón, certame que recupera l’Asociación Literaria tres once años de parón. Ésta va tener llugar nel Paséu de Begoña dende mañana hasta’l llunes y va contar con un programa ampliu d’actividaes.