El teatru costumista toma'l Prendes de Candás

|
'Hasta que tu madre nos separe' del Grupo de Teatro Rosario Trabanco

Van reprentase doce obres ente los díes 16 y 27, de les que cinco son estrenos absolutos.

El primeru del XXVII Salón de Teatru Costumista Asturianu de Candás va ser 'Hasta que tu madre nos separe', de José Ramón Oliva, que va representar esta nueche a les 23 hores –horariu oficial del certame– el xixónés Grupo de Teatro Rosario Trabanco. Les obres de mañana y el vienres tamién van ser estrenos: 'Viva el vino, las mujeres... Y la vaca', de Tito Casado, pol Grupu de Teatru Ensin Reparu (Sebares) y 'Les fiestes de guardar', de Sergio Buelga, pola Compañía Asturiana de Comedias, de manera respeutiva.

El restu, hasta llegar a cinco, van celebrase'l miércoles viniente, cola representación de 'Chez Telva', d'Oliva, por Santa Bárbara Teatro (Llaranes), y el vienres 25 con 'La maxa de la primera vez', tamién d'Oliva, por La Farola de Xixón. El restu de la programación ye la siguiente: 'L'efeutu caparina', de Teatru Carbayín, en doble función (20 y 23 hores) el sábadu; 'El sexu de los ánxelos', del Grupo de Teatro de Valdesoto, el domingu; 'Hai que darye un escarmento', del Grupo de Teatro Casadoiro d'Anlleo, el llunes; 'Divorciu de grupu', del Grupu de Teatru Refaxu (Blimea), el martes; 'Adoptamos', de l'Agrupación Padre Coll (La Felguera), el xueves 24; 'Fabes SA', de Teatro El Hórreo (Barcia), el sábadu 26 tamién en doble función; y 'Xuaco, el Farolete', del Grupo Cultural Xana (Perlora), el domingu 27.

La entrada pa caúna de les funciones ye de 6 euros –de 4 pa los socios del Teatru Prendes– y va ser posible mercales dende una hora enantes del comienzu de la representación. Otra manera, el vienres 1 la instalación candasina va acoyer la gala de los XV Premios Aurora Sánchez de Teatru Costumista Asturianu, na que va entamase l'espectáculu 'Desde la gala con amor', d'Alaín Fernández. Esti eventu tien entrada llibre.

Na semeya, ensayu de 'Hasta que tu madre nos separe', del Grupo de Teatro Rosario Trabanco, obra qu'abre'l certame.

Contador Estadistiques