El teatru costumista, protagonista nel mes d’ochobre en La Pola Ḷḷena

Tolos vienres d’ochobre va representase una obra de teatru costumista nel Vital Aza dientro de les xornaes dedicaes a esti xéneru qu’entama’l Conciyu de Ḷḷena. En total son cuatro les funciones que va acoyer el recintu ḷḷenizu.

El grupu de teatru avilesín ‘Santa Bárbara’ va ser l’encargáu d’abrir mañana les xornaes cola obra ‘De l’Argentina a La Pola’, a la que va siguir, el vienres 11, ‘L’apuesta los centollos’, de los llangreanos Teatro Kumen. El día 18 va ser el turnu de los valdesanos El Hórreo con ‘Las trampas del vecín’, pa finar esti ciclu de teatru costumista nel que collabora FETEAS y la Conseyería d’Educación, Cultura y Deporte, con ‘Les ayalgues de la marquesa’, de los sierenses Grupu de Teatru Carbayín. Toles representaciones van principiar a les 20 hores.

La entrada pa cada función tien un preciu de 5 euros, pero ye posible mercar un bonu pa ver les cuatro obres por 15 euros. Éstos véndense na Casa de Cultura de La Pola Ḷḷena de 10 a 14 horres y nel propiu teatru de 19 a 20 hores. Los interesaos en mercar entraes pa una función, namái pueden facelu nel mesmu día de la representación.