El Taller d'Asturianu de Villaviciosa cambia d'ubicación por obres

Los trabayos nel edificiu del Atenéu Obreru obliguen a treslladar el cursu aptu pa tolos niveles, que yá tien abierta la inscripción.

El Serviciu de Normalización Llingüística 'Comarca de la Sidra', en collaboración cola entidá creada nel 1911, entama una edición nueva del Taller d'Asturianu de Villaviciosa. Nesta ocasión les clases van treslladase a la cai Cervantes, númberu 10, por mor de les obres que se tán desendolcando nes sos instalaciones.

El cursu ta empobináu pa toda persona interesada n’ampliar los sos conocimientos sobre llingua asturiana independientemente del so nivel, y atenderá tanto pa la estaya oral y como pa la escrita, onde entrará'l repasu de les principales normes ortográfiques, asina como de la historia, la socioloxía y les producciones culturales feches n'asturianu. Va tener llugar los martes, de 18 a 20 hores, con comienzu'l 1 d'ochobre y final en febreru.

Hasta esi mesmu día los interesaos pueden apuntase o pidir más información nel teléfonu 985.89.02.75 o nel corréu electrónicu normastur@lacomarcadelasidra.com.