El Supremu elimina la ratio mínima pa cursar Llingua Asturiana

|

Comisiones Obreres (CC OO) ganó nel Tribunal Supremu’l recursu contra la sentencia qu’elimina la ratio mínima pa cursar Llingua Asturiana. Los escolinos van poder estudiar l’idioma ensin depender del númberu d’alumnos qu’haya en clase.
 
La Sala de lo Contencioso-Alministrativo, Estaya Cuarta, del Tribunal Supremu, con fecha 24 d'abril del 2012, tornó'l recursu de casación interpuestu pola Conseyería d'Educación contra la sentencia del  Tribunal Superior de Xusticia d'Asturies (TSXA), qu'estimaba la demanda interpuesta por CC OO contra la Resolución del 16 de mayu del 2008 de la Conseyería pola que s'establez la ufierta y les condiciones pa la eleición de materies optatives y materies opcionales pa la Educación Secundaria Obligatoria (ESO). El Supremu torna'l recursu de casación interpuestu pol Lletráu del Serviciu Xurídicu d'Asturies y confirma la nulidá del artículu 5.1 de la Resolución impugnada, qu'establecía un númberu mínimu d'ocho alumnos pa formar un grupu na asignatura de Llingua Asturiana en Secundaria.
 
Tamién, al igual que yá fixera antes el TSXA, da la razón a una reclamación histórica de CC OO, la de garantizar el derechu a cursar l'asignatura d’asturianu de forma voluntaria ensin depender del númberu d'alumnos que lu solicite, según informó’l sindicatu. El Supremu entiende que nun hai llugar pal recursu de casación y confirma la sentencia del TSXA, que considera que l'Alministración, al establecer un númberu mínimu pa formar un grupu, se deslliga de la obligación que-y impón l'artículu 10.1 de la Llei 1/1998 d'Usu y Promoción del Bable/Asturianu de garantizar el so enseñu en tolos niveles y graos, con independencia del númberu d'alumnos qu'opten.
 
CC OO estima "de manera satisfactoria" esta sentencia. "Tamos, ensin dulda, ante una bona ocasión pa una celebración allegre y con esperances renovaes. Les sentencies del Supremu y del TSXA constitúin too un referente nel camín hacia la normalización llingüística y nel respetu a la nuesa cultura". Amás, el sindicatu esixe’l cumplimientu de la sentencia: "Yá nun caben más falcatrúes. Yá nun val derivar hacia otres materies al alumnáu que, optando pola enseñanza de la Llingua Asturiana, nun llega al númberu mínimu d'ocho alumnos”.
 

Contador Estadistiques