El Supremu decide que Sortu se quede fuera de les eleiciones

El Tribunal Supremu prohibió’l miércoles la inscripción de Sortu, formación nueva de la izquierda abertzale, nel rexistru de partíos. La Fiscalía y l’Abogacía del Estáu presentaren una demanda al considerar a Sortu herederu de Batasuna.
 
La decisión llegó tres una deliberación de más de nueve hores ente los maxistraos y contó con tres votos particulares que discrepaben cola opinión de la mayoría. D’esta forma’l Supremu impedía la participación de la formación política nueva de la izquierda abertzale al considerala heredera de Batasuna, illegalizada en marzu del 2003 al considerar que taba vinculada con ETA. Sortu podría recurrir agora ante’l Tribunal Constitucional.
 
Tolos partíos políticos vascos consideren un error la illegalización de Sortu y, inclusive, el presidente del PSE-EE, Jesús Eguiguren, señaló que l’apuesta pola paz de la formación yera “sincera” y que prefiría la llegalización del partíu abertzale. Mentes, dende Eusko Alkartasuna (EA) consideren que la decisión del Supremu “ye un escándalu políticu” que demuestra que’ésti ye “un órganu políticu”. “Tamos ante un intentu per parte del Estáu d’entorpecer l’imparable procesu de normalización política que va inaugurar un ciclu políticu nuevu nel nuesu país”, señaló Maiorga Ramírez, secretariu territorial d’EA en Nafarroa. Pela so parte, Izquierda Xunida señaló que la illegalización de Sortu “ye un error que nun va ayudar al fin d’ETA”.
 
Los promotores de Sortu van facer esta tarde en Bilbao una valoración del fallu del Tribunal Supremu.