El stand d’Asturies en Fitur recibió 50.000 consultes

Esti domingu zarró les sos puertes la madrilana Feria Internacional de Turismo (Fitur), onde Asturies tuvo presente. El stand del país nel IFEMA recibió 50.000 consultes y acoyó 67 alcuentros profesionales.

La información requerida pol públicu foi, de manera principal, la rellacionada col turismu rural y de salú, les rutas de senderismu, el Prerrománicu y la gastronomía del país, según informó güei la Conseyería d’Economía y Emplegu. Amás, nos seis díes de duración de Fitur, col oxetivu d’implementar el posicionamientu d’Asturies nel mercáu internacional y incrementar la so cuota de mercáu, concretáronse alcuentros con representantes de Turespaña y colos direutores de les oficinas estatales de turismu en Berlin, Frankfurt, Düsseldorf, München, París, Bruxeles, Roma, Londres, Nueva York, Dublín y Den Haag (La Haya).

Nel planu comercial, estableciéronse rellaciones con 37 turoperadores, axencies de viaxe y consultores turísticos. D’igual forma, el Gobiernu contautó con dalgunes empres de creación recién, como Offerum.com, Restalo.com, DestinoAsturias.tv y Escapada Rural. Según la conseyería, l’oxetivu ye introducir conteníos de productu y de destín Asturies, asina como ampliar la oferta yá esistente n’otros portales yá consolidaos. Tamién s’intentó promover la difusión de conteníos sobre’l país en medios de comunicación, pa lo que se faló con 17 espublizaciones, ente elles la revista líder del seutor profesional de turismu, Hosteltur; les cabeceres principales de viaxes, como Conde Nast Traveler, Turismo Rural, Lonely Planet o Viajes National Geographic; y dalgunos blogs temáticos.

 El Gobiernu destacó estos bonos datos pese al recorte del 30 por cientu nel presupuestu pa Fitur, lo que llevó a presentar un stand más pequeñu nesta edición. “Foi llamativu l’ésitu del espaciu, que recibió dende’l día d’inauguración hasta la clausura una valoración mui positiva por parte tanto de los profesionales del seutor como de representantes políticos", señalaron dende Economía y Emplegu.