El Sporting xuvenil comienza en Ciudad Real la llucha pol títulu estatal

El Lealtad pierde la categoría y acompaña al Caudal a Tercera, onde'l Vetusta confírmase como campeón, a falta de dos xornaes.

Las Palmas ye'l rival del Sporting xuvenil nel enfrentamientu de cuartos de final de la Copa de Campeones que se va celebrar esta tarde, a les 16 hores, na Ciudad Deportiva Sur de Ciudad Real, partíu que va poder vese en direuto per televisón per GOL. Nel casu de superar al conxuntu canariu, los d'Isma Piñera cruciaríense col ganador de la eliminatoria ente'l Málaga CF y el Barcelona, choque que ser xugaría'l miércoles a les 17 hores nel Príncipe Juan Carlos de la población castellana.

El restu de crucies son Tenerife-Athletic Club y el 'derbi' Atlético-Atlético Madrileño. Dambos choques van celebrase en Puertollano.

El Sporting B pierde'l lideratu

Nun foi una bona xornada pa los equipos asturianos del grupu segundu de Segunda División B. El Sporting B viose superáu pola Real Sociedad B en Mareo por 0-1 con tantu d'Olaizola, resultáu que sumao al trunfu del Mirandés por 1-0 col Real Unión faen que los de José Alberto pierdan el lideratu a falta de dos xornaes pal final.

El sábadu confirmábase'l descensu del Lealtad, que salió goliáu de Lezama. Tres llegar al descansu con ventaya por 2-0 y encaxar el terceru pronto tres la reanudación, sabiéndose descendíos, los de Villaviciosa baxaron los brazos hasta encaxar ocho tantos.

El conxuntu de Les Caleyes acompaña asina al Caudal a Tercera División, equipu que perdía na so visita al Vitoria por 3-1. Los de Mieres van finar la temporada como colistes.

Cuatro equipos pa trés puestos

El Vetusta conquistó'l títulu de Lliga del grupu segundu de Tercera División y va afrontar la llucha pol ascensu pela vía rápida. El filial del Uviéu empató ensin goles na so visital al Condal y completa una segunda vuelta espectacular.

El restu de places pa participar nes eliminatories pa buscar el saltu de categoría tienen cuatro aspirantes. Los meyores colocaos son l'UP Langreo y el Marino, con 72, mentes que'l Llanes suma 69 y el CD Covadonga, 68.

Los descensos del Caudal y el Lealtad tamién tienen les sos consecuencies na categoría, yá que si nun se consuma nengún ascensu arrastraría a dos equipos más pa preferente. La parte baxa ta apretada, col Roces con 24 puntos, el Valdesoto con 27 y l'Atlético de Lugones y l'Avilés con 28, mentes que'l Club Siero, el Llanera o'l Colunga podríen vese perxudicaos pese a sumar 36, 38 y 41 puntos, de manera respeutiva.

L'UD San Claudio, a Tercera

Yá ye equipu de Tercera l'UD San Claudio, conxuntu que va debutar na categoría. Lluchen polos otros dos puestos, a falta de trés xornaes, La Madalena de Morcín (70 puntos), l'Universidá d'Uviéu (64), el Ribadesella CF (62), el Vallobín (56) y el Lenense (56).