El Sporting sacó tarxeta colorada al maltratador

L'equipu xixonés amosó’l pasáu domingu’l so rechazu a la violencia de xéneru vistiendo una camiseta cola imaxe de la campaña antes del entamu del alcuentru cola Real Sociedá.

La Directora del Institutu Asturianu de la Muyer, María Fernández Campomanes, estimó la collaboración del equipu xixonés nesta campaña “porque la so capacidá de llegar a la xente ye enforma mayor que la que tenemos les alministraciones públiques”.

Amás, la Directora del Institutu convidó a el siguidores del Sporting a sumase tamién, porque “cualesquier puede sacar tarxeta colorada al maltratador dende la web www.sacatarjetaroja.es y de esta forma espresar la so refuga contundente a la violencia contra les muyeres”.

L'oxetivu de la campaña ye que medre’l nivel de rechazu de la ciudadanía ante'l maltratu, sensibilizar a la sociedá sobre la necesidá d'aisllar al maltratador y amosar tolerancia cero con toles formes y graos de la violencia contra les  muyeres.

María Fernández Campomanes recordó la necesidá de siguir realizando xestos como esti, yá que “añu a añu nun llega al 2% el númberu de denuncies que son interpuestes por persones de la redolada de les víctima, por familiares, por amigos, por terceros, como dicen les estadístiques”

Preciado, imaxe de la campaña
La campaña institucional “Saca tarxeta colorada al  maltratador”, amás de les  fotografíes, inclúi otres acciones de comunicación como son  spots de televisión, cuñas de radiu, cartelería, banners en webs, traseres d'autobuses y “mupis”.

Siguiendo'l modelu de la campaña estatal, l'elementu principal son diez persones que destacaron na so trayectoria profesional y que tienen una estrecha vinculación con Asturies, qu'emprestaron la so cara y la so voz de forma desinteresada a esta campaña. Dase la circunstancia de qu'una d'eses persones ye l'entrenador del Sporting, Manolo Preciáu.

El restu de cares y voces que participen na campaña son: los futbolistes Santi Cazorla y David Villa; los periodistes Juan Ramón Lucas y Ana García Siñeriz; los integrantes del grupu musical “El Sueño de Morfeo” (Raquel del Rosario, Juan Luis Suárez y David Feito); la montañera Rosa Fernández; la piragüista Jana Smidakova; y los cantantes Cristina del Valle y Víctor Manuel.