El Sporting regala l'empate en casa

Al reves de lo que suel facer, el Sporting de Xixón salió ayeri al campu d'El Molinón cola idea bien clara de quedar colos tres puntos énte un Leganés que nun tenía por qué sere pilancu nel oxetivu del ascensu a primera. Controlando'l xuegu dende l'aniciu, los de Marcelino ficieron bones xugaes, pero la defensa madrilana tarazaba sistemáticamente toles entraes del Sporting, que tardó muncho en ser a axustar un balón ente los tres palos. Al final del primer tiempu, cuando l'equipu asturianu taba afogando al rival, llegó por fin un merecidísimu gol. Tres d'un regate imposible pela banda de la derecha, Pablo foi a da-y el balón a Mate Bilic, que en cuenta d'arronchar cola pelota, dio-yla de tacón a Diego Alegre, que remachó a la rede col porteru del Leganés valtáu. Yera un gol que-y daba fuelgu al equipu pa enfrentar una segunda parte que tenía de ser más a posentada, pero ello nun diba ser asina.

Ello foi que namás pitar l'árbitrio l'aniciu del segundu tiempu, el Leganés arrolló al Sporting, que varó dafechu. Les oportunidaes del equipu visitante socediéronse hasta llegar al minutu 56, en que Calandria punxo l'empate definitivu en marcador tres d'una xugada nel area bien asemeyada a la que-y diere'l gol al Sporting. Cola igualada nel electrónicu, el Sporting diose y los nervios acabaron col pocu fútbol que-yos quedaba a los asturianos. Nin los tres cambeos de Marcelino, que se desesperaba viendo como los d'elli fallaben un pase tres d'otru, valieron pa iguar l'esfarraple d'un conxuntu que menguaba a cada minutu. Mientres el Leganés tuvo otres dos ocasiones clarísimes pa marcar, el Sporting nun pudo más que tirar un par de balones penriba de la portería madrileña y forzar unos pocos corneres. A lo último, el Sporting conformose con telegrafiar balonazos dende atrás a Mate Bilic o con echa-yla a un Pablo Álvarez que, como siempre, fizo un gran llabor pela carril derecha pero que tenía a trés defenses pa contra elli.

L'empate supón tirar una gran ocasión pa volver a los puestos d'ascensu, anque los resultaos de los demás equipos caltienen al Sporting a un puntu del oxetivu. La siguiente final pol ascensu, contra'l Numancia. Pa esti trescendental partíu Marcelino va tener a tola plantiya, anque ta por ver que pasa col porteru Roberto, qu'ayeri franció dellos dientes al cayer al suelu nuna xugada.