El Sporting nun convence na estrena

El Sporting de Xixón presentose oficialmente nun Molinón que tuvo más xente que davezu. El buen tiempu y el que la entrada fore de baldre foron argumentos abondos pa convencer a cerca de 15.000 persones a allegase hasta'l campu pa ver a un Sporting que, sacantes momentos de xuegu curioso, nun dio la talla énte un rival de primera división como ye l'Osasuna.L'actu de presentación valió pa confirmar otra vuelta'l divorciu ente la grada y l'entrenador, Pepe Acebal, que tuvo qu'aguantar pitos de parte del públicu, tolo contrario que Lediakhov. El rusu, esiliáu dientro'l so propiu equipu, sigue contando col preste d'una afición que tamién-y dedicó aplausos a Quini, que anque namás seya delegáu de campu, sigue como remembranza viva d'un tiempu que nun tien traza de que vaya tornar.Yá nel partíu, el Sporting, anque xugó con bastante orde, nun foi quien a arrimase a la portería d'Unzué. Si pa la parte d'atrás Pablo Amo mandaba una defensa bien armada, la delantera nun trabayaba bien. Tolos balones asturianos a la meta Navarra vinieron de tiros dende fuera l'area, y los más d'ellos con poca puntería. Otramiente, tampoco ye que los visitantes fixeren munchu llabor atacante, pero llamó l'atención el fechu de que, pa ser un partíu amistosu, nengún de los dos equipos escatimare n'entraes dures. Na segunda parte llegaron la meyor oportunidá asturiana y tamién el gol del Osasuna. Na primera, Villa, Pablo Álvarez y Ismael tuviéronlo a güevu pa marcar tres una xugada de llibru, pero la pelota salió alta. Xusto cuando parecía que'l Sporting comía al Osasuna, los navarros marcaron gracies nuna xugada de Antonio López y ochoa que remató Palacios. Con pocu tiempu per delantre, el gol enfrió'l partíu, qu'acabó dexando la impresión de que'l Sporting, arriendes de detalles de calidá, entovía nun ta rodáu.