El Sporting esmigayó en defensa y n'ataque

El Sporting dio ayeri énte l'Almería la peor imaxe de la temporada perdiendo por 3-0 nun partíu en que Ciriaco Cano ensayó cola estratexa ensin ser a iguar el mal xuegu del equipu. Roberto torgó una derrota mayor.

El Sporting, que llegaba a Almería cola obligación d'entornar la llinia de malos resultaos que llevaba nes últimes trés xornaes, llevó en Roquetas de Mar una auténtica cuera de goles contra un Almería que, anque tardó en marcar el primeru, achapló al Sporting nuna segunda parte en que los de Ciriaco amoriaron pel campu ente constantes cambeos d'estratexa del técnicu sportinguista que nun foron a iguar el mal xuegu del equipu. Nel primer tiempu, dempués d'una fase en que'l Sporting, anque tuvo a la defensiva, tamién fizo dalgún disparu con ciertu peligru gracies a Juan mayormente, llegó la lesión de Sastre, qu'obligó al técnicu a da-y entrada a Jeffrey, entamando entós un declive nel xuegu del Sporting que llevó a que l'Almería abriere la cuenta a poco de llegase al descansu nun centru de Francisco a Varela dende la banda. Cola desventaya pela mínima, el Sporting, qu'entamó'l segundu tiempu cola novedá de Biagini por Michel, en cuenta d'esconsoñar fizo un segundu tiempu entovía peor. Col Almería crecíu, los locales amarraron el partíu a los diez minutos del segundu tiempu con un golazu de Francisco, que quedó solu énte Roberto. El porteru del Sporting, el meyor ayeri del equipu,asturianu, paró-y un penalti poco dempués al mesmu Francisco, pero nun pudo atayar una segunda pena máxima por derribu de Carmena a Crusat que tresformó Michel nel 3-0 definitivu. En tola segunda parte el Sporting nun esistió n'ataque sacantes los primeros minutos.