El Sporting despidió un añu emocionante

El públicu d'El Molinón despidió al Sporting nel remate a la temporada más emocionante dende que baxó a segunda tomando'l campu a trés minutos del final y abrazándose a los xugadores. El resultáu, favorable al Sporting por 1-0, foi lo de menos nuna tarde en que pesó más el sentimientu dempués de perdese la última opción d'ascensu a primera la selmana pasada.

Dempués d'una temporada estrada de milagros deportivos, el Sporting despedía l'añu xugando en casa contra'l filial del Málaga.

L'entrenador asturianu aprovechó la despidida del añu pa da-yos entrada a futbolistes que nun aveza a poner nes llistes de titulares, y ello conocióse nel xuegu del Sporting, que, anque entamó dominando, foi desfaciéndose según pasaba'l tiempu y sobremanera dempués de los cambeos, qu'acabaron de disolver el bloque. Con too y con ello, hai qu'agradecer la presencia atrás de Yago, que tarazó tolos intentos del Málaga B por empatar un partíu que'l Sporting encarriló yá nel minutu 8 gracies al gol d'Álvaro, ún de los nuevos que pudieron vese esti sábadu en Molinón. Anque lo deportivo yera secundario y los dos equipos se dedicaron a facer un xuegu lo más guapo que supieron anque ensin munchos detalles de calidá, nun pue dexar de conseñase la presencia de xente como Jeffrey Hogervorst, Gerardo o'l debú de David Lago.

A trés minutos del final el públicu tomó'l campu y precisáronse de 10 minutos pa desocupar y podre xugar lo que quedaba de partíu, produciéndose al final otra invasión del campu polos aficionaos, que quixeron agradecer un añu en que, por primer vegada, suañaron col ascensu cuando menos contaben con ello.

Nun hai qu'escaecer que'l Sporting llegó a esta campaña atacáu de problemes económicos y que de mano dábase por bono l'aguantar la categoría.

El Sporting, quintu clasificáu final na lliga con 70 puntos, el meyor resultáu nos seyes años que leva en segunda, piensa yá na campaña qu'entra. De mano, l'entrenador Marcelino ta acabante de firmar la renovación, pero ver verase que pasa cola plantiya. Nel celta cuenten con recuperar al poteru Roberto y podríen facer otru tanto col defensa Yago, referencia nesta temporada. Na parte d'alantre, el bloque queda ensin Bilic, que tamién ye cesión, nesti casu del Zaragoza. Cobas y Segovia tampoco nun van siguir, estos por decisión del club de trespasalos.