El Sporting complícase la vida

Dempués de 16 xornaes aguantando nos puestos de cabeza de la tabla, el Sporting perdió ayeri la plaza d'ascensu a primera al perder col Elche por 2 a 1 nun partíu en que los de Marcelino acabaron con nueve por espulsión de Samuel y de Jeffrey Hoogervorst.

Con ser meyor a lo llargo de tol partíu, el Sporting repitió la mormera qu'arrastra en tolos partíos durante'l primer cuartu d'hora y asina encaxó otra vegada un gol nos primeros diez minutos de partíu, obra de Moisés, que falló primero otres dos ocasiones. Col marcador en contra, l'equipu asturianu afogó al rival, pero ensin aciertu de cara a la portería. Pa poner peor les coses, una acción boba de Samuel al tocar el balón cola mano, dexaba al equipu con diez cuando la primer parte taba dando les boquiaes.

Ello nun foi abondo pa que'l Sporting se diere, y el segundu tiempu foi un monólogu astur hasta que Nino aprovechó, como suel pasar nestos casos, una xugada a la contra pa marcar el 2-0. Los alicantinos bien pudieron marcar un terceru, pero Jeffrey, el defensa holandés que deprendió na escuela de Mareo, nun duldó en sacrificase y recibir la encarnada pa torgar l'avance del rival. El Sporting forzó la máquina y nel 75 un penalti tresformáu por Mate Bilic devolvía al equipu asturianu al partíu, pero ello nun foi abondo. Rubén, que fizo una chilena, y Bilic, que falló dos ocasiones clarísimes, demostraron la impotencia nel remate d'un equipu que frayó al rival en tolo demás.