El Sporting B va lluchar pol ascensu a Segunda División A pela vía llarga

|
Sortéu ascensu RFEF

La victoria del Mirandés fai estéril la remontada del filial roxiblanco frente al Arenas, que va tener como primer rival al Celta B, al Cornellà o al Extremadura UD.

Un gol de Diego Peláez nel minutu 69, poco depués de que Pablo Fernández marcara'l gol del empate n'El Molinón con un Arenas que nel minutu 26 ganaba 0-2, daba'l títulu de Lliga al Mirandés y, con ello, la posibilidá de lluchar pol ascensu a una sola eliminatoria. Los de Miranda de Ebro derrotaba por 1-0 al Gernika, mentes que'l Sporting B consiguía asegurar la segunda plaza gracies a un gol nel añadíu de Traver que ponía'l 3-2 definitu, a la qu'aspiraba la Real Sociedad B que, mientres casi una hora, llegó a ser líder virtual.

D'esta forma, el filial sportinguista va cruciase con un cuartu clasificáu na primer de les trés eliminatores qu'ha de superar p'algamar l'ascensu a Segunda División A, que siempre va tar condicionáu al tamién ascensu del primer equipu, anguaño en posiciones de play-off. El Celta B, el Cornellà y l'Extremadura UD son los sos rivales posibles nel sortéu que va celebrase esta tarde dende les 16.30 hores na Ciudad del Fútbol de Las Rozas.

Los equipos que van competir pela vía curtia pol ascensu, esto ye, los campeones de cada grupu, son el Rayo Majadahonda, el Mirandés, el Mallorca y el Cartagena. El restu de clubes clasificaos, que van dir pela vía llarga, son el Fabril –que nun pue xubir pol descensu del so primer equipu a Segunda–, el Fuenlabrada, el Celta B, el Sporting B, la Real Sociedad B, el Villarreal B, l'Elche, el Cornellà, el Marbella, el Murcia y l'Extremadura UD.

Mentes, van lluchar por evitar el descensu'l Coruxo, l'Izarra, la Llagostera y l'AD Mérida. Los otros dos conxuntos asturianos de la categoría, el Lealtad y el Caudal, baxen a Tercera xunto col Osasuna B y el Peña Sport.

El Marino y el Llanes, clasificaos

A les 17 hores, tamién en Las Rozas, va celebrase'l sortéu de les eliminatories d'ascensu a Segunda División B, nel que finalmente'l Marino y el Llanes van acompañar al Vetusta –como campeón– y al UP Langreo como representantes asturianos. Los trunfos de lluanquinos por 3-0 col Siero y de los llaniscos por 2-1 col filial del Uviéu dieron-yos plaza en detrimento del CD Covadonga, qu'empató a dos goles en Noreña col Condal cuando necesitaba ganar y un pinchazu d'ún de los sos rivales.

Descienden a preferente xunto col Roces l'Atlético de Lugones y el Valdesoto, salvándose virtualmente de la quema l'Avilés tres ganar 4-1 al Mosconia. Sicasí, los avilesinos, al igual que'l Siero, depende del ascensu d'equipos asturianos pa nun baxar por mor del descensu de Lealtad y Caudal.

L'Universidá torna a Tercera

Tres trés campañes en preferente, l'Universidá d'Uviéu torna a Tercera División. El trunfu por 0-4 na so visita al Nalón, xunío a la derrota por 2-0 del Ribadesella CF col Andés, permite al conxuntu uvieín la vuelta a la categoría onde desendolcó tola so trayeutoria a partir de'l 1990, con trés campañes en Segunda División B pentemedies.

Los universitarios acompañen nel ascensu al UD San Claudio y a La Madalena de Morcín, lo que dexa too decidío perriba cuando falta una xornada pal final. Baxa a primera'l Manuel Rubio, col Unión Comercial (37 puntos), el Rayo Carbayín (38), el Turón (39) y l'AD Ribadedeva (40) lluchando por evitar les otres dos places, anque dos d'ellos cuenten col mesmu problema que l'Avilés y el Siero en Tercera pol doble descensu asturianu en Segunda División B.

El Sporting xuveni, con ventaya pa Zubieta

Nel partíu d'ida de los octavos de final de la Copa xuvenil el Sporting superó en Mareo a la Real Sociedad B por 3-1, polo que viaxa a Donostia con ventaya. Pelayo Morilla adelantó a los d'Isma nel minutu 10, anque los vascos consiguiríen empatar al filu del descansu por un penalti tresformáu por Roberto López.

Miguel, nel 54, y Sandoval, nel tiempu añadíu, pondríen el 3-1 definitu. El partíu de vuelta va disputase en Zubieta'l domingu al meudía.

 

Contador Estadistiques