El Sporting algama'l so récor históricu de socios

Son 24.000 los sportinguistes que tienen abonu pa la temporada viniente.

Esta cifra récor de socios llega precisamente nun momentu de distanciamientu ente un ampliu sector de l'afición y el conseyu d'alministración lideráu por Javier Fernández, enantes dende la vicepresidencia y agora dende la presidencia, por mor de la nefasta xestión del club que lleva al Sporting a competir un añu más en desigualdá de condiciones col restu de clubes por tener que destinar una parte amplia del presupuestu a pagar deudes contrayíes nel pasáu. Ello vese reflexáu nun proyeutu deportivu austeru que tien como oxetivu únicu algamar la permanencia, lloñe d'aspiraciones pasaes, lo que nun desanima a los siguidores roxiblancos.

Asina, l'aforu de casi 30.000 espectadores d'El Molinón quédase pequeñu per primer vegada dende les reformes pa convertir les graes de pie n'asientos y l'ampliación del 2011. La necesidá de dexar entraes llibres pa compromisos con patrocinadores y pa l'afición visitante fixo que'l conseyu d'alministración del Sporting punxera como llende los 24.000 abonaos, cifra a la que se llegó ayeri, cola posibilidá de crear una llista d'espera siguiendo'l modelu del Athletic Club hasta la construcción del nueu San Mamés.