El Sol Celta enllena Avilés de folixa y música atlántica

Cerca de trenta conciertos conformen el programa del VIII Sol Celta, festival de raigañu atlánticu que cuenta tamién con presentaciones de llibros, charres y animaciones na zona vieya d’Avilés. Manolo Peñayos, Alienda, La Tarrancha o Fontoria son dalgunes de les formaciones que van tocar ente esti llunes y el domingu.

La zona de la villa asitiada ente la cai del Sol y La Ferrería y les places Alfonso VI y Carlos Lobo van acoyer el Mercáu Sol Celta –inaugúrase esta tarde a les 18 hores y va abrir al meudía’l restu de díes–  y los diferentes escenarios nos que se van desendolcar los conciertos y el restu d’actividaes entamaos pola Asociación Cultural Ventanilla 69, organizadora del certame. Los músicos asturianos van llevar el pesu principal nesta edición, cola presencia tamién de los lleoneses Fran Allegre (güei, 21 hores) y La Jari (vienres, 23.30 hores), los gallegos Airoa (güei, 21.30 hores) y los vascos Kolme Katu (vienres, 22.30 hores).

Fontoria, Ún de Grao, Figos de Tuna, Caldo y Os Rabizos, Mur, La Tarrancha, Manolo Peñayos, La Patrulla Dixie o Alienda, ente otros, son dalgunes de les formaciones que conformen la escoyeta de bandes asturianes de dellos estilos que va poder disfrutar estos díes avilesinos y visitantes. Tonada, presentaciones de llibros, representaciones teatrales o una charra de la Lliga Celta d’Asturies sobre los ástures a cargu del so presidente, Fernán Morán, programada pal miércoles a les 18.30 hores nel palaciu de Valdecarzana, completen el Sol Celta.

Na semeya, actuación de Serendem nel escenariu instalado na plaza Alfonso VI na edición del añu pasáu.