Skip to content

El socialista Javier Fernández, candidatu únicu a presidir el país

Mayu 21, 2012 por E.P. / Redacción

Esti llunes, a les 10 hores, finó’l plazu pa presentar candidatures pa presidir el país. El socialista Javier Fernández ye la persona única qu’aspira al cargu, yá que nin Foro de Ciudadanos nin Partido Popular inscribieron a los sos líderes.
 
Fernández va relevar a Francisco Álvarez-Cascos al frente del Executivu, yá que va tener l’apoyu de los cinco parllamentarios d'Izquierda Xunida y del diputáu únicu d'UPyD n'Asturies, Ignacio Prendes, col que selmana pasada algamó un pautu de llexislatura que fraya l'empate a 22 escaños ente les fuercies de la izquierda (PSOE-IX) y de la derecha (PP-FORU). El debate pa la eleición del presidente del país va principiar mañana, a les 10 hores, en sede parllamentaria cola intervención, ensin un tiempu marcáu, del candidatu únicu. La sesión va reabrise 24 hores más tarde coles intervenciones de los cinco grupos, que van disponer d’un tiempu máximu de 45 minutos, con opción a retruque.
 
De nun haber sorpreses, el políticu mierense va salir investíu por mayoría na primer votación y va tomar posesión del so cargu de presidente esti sábadu, día 26, dos meses y un día depués de les eleiciones antemanaes del 25 de marzu pasáu.

Comparte...