Evo Morales, representante del izquierdista Movimientu al Socialismu (MAS) salió escoyíu por mayoría absoluta presidente de Bolivia, siendo'l primer indíxena qu'algama la xefatura del estáu nos 180 años d'independencia del país.
D'etnia aymara, Evo Morales ye'l líder del MAS, el partíu qu'axuntó los intereses y algamó la representatividá de les etnies aymara y quechuá, secularmente marxinaes y dixebraes de la so participación nel aparatu estatal de Bolivia. Ye por ello qu'ún de los mandaos que se propón cumplir Evo morales sía'l del "reconocimientu de la personalidá indíxena" inxertando nel so programa les reivindicaciones d'autodeterminación, identidá, soberanía y dignidá que reconoza los derechos de los indíxenes y que revierta la riqueza de la nación na meyora de les condiciones sociales y económiques de la población. Ún de los preseos más importantes pa ser a ello qu'anunció Morales diba ser la nacionalización de los recursos enerxéticos de gas y petroleu, que remanen agora mesmo les compañíes estranxeres multinacionales Repsol, Petrobras, TotalFina y British Gas, anque Morales emite mensaxes de calma a les empreses y da anuncia de que nun cuenta con confiscá-yos toles sos propiedaes a les multinacionales, anque sí quier que l'Estáu controle tola cadena productiva pa qu'ello lleve a la meyora de les condiciones de vida de los bolivianos, un pensamientu que resume na frase "Bolivia precisa de socios, non de patrones"
De familia d'agricultores, Evo Morales va tener tamién na cuestión de la cocaína ún de los puntos más difíciles del so llabor de gobiernu. Morales defende que se desanicie'l tráficu mundial de cocaína, pero tamién inclúi nel so programa de gobiernu la necesidá de caltener el cultivu de la coca, una planta enraigonada na cultura de les etnies aymara y quechuá y de la qu'esiste un comerciu llegal en Bolivia, amás de ser una materia prima de la que s'obtienen medicines y otros productos beneficiosos.
En confirmándose col recuentu electoral el trunfu de Morales -el particular sistema electoral bolivianu podía dexalu fuera del gobiernu de nun algamar el 51% de los votos- el Conseyeru de Xusticia asturianu Javier Valledor emitió un comunicáu de felicitación al yá presidente electu de Bolivia, al que conoció personalmente nuna visita que Morales fexo a Asturies n'abril del 2004.