El soberanismu gana unes eleiciones catalanes marcaes pol descensu de Convergència i Unió

Artur Mas nun consiguió’l so oxetivu de reforciar la so posición al frente de la Generalitat al traviés de la so apuesta independentista y perdió 12 escaños nes eleiciones catalanes. Sicasí, el soberanismu tornó a ganar en Catalunya.

Los partíos nacionalistes sumaron un total de 74 votos –a los qu’hai que sumar los 13 d’Iniciativa per Catalunya Verds-Esquerra Unida i Alternativa (ICV-EUiA), formación que defende’l derechu a decidir del pueblu catalán– de los 135 del Parlament, polos 48 de los partíos españolistes. Inclusive, la coalición Esquerra Republicana de Catalunya-Catalunya Sí (ERC-Cat Sí) situóse como segunda fuercia más votada, per delantre del PSC, al sumar 21 escaños polos 20 de los socialistes.

Convergència i Unió (CiU) repitió como fuercia más votada nes eleiciones anticipaes convocaes por Mas tres xubise al carru independentista depués de la fuercia qu’esti movimientu amosó na Diada Nacional de Catalunya, con más d’un millón de persones nes cais de Barcelona reclamando’l derechu del país mediterraneu a ser un estáu européu. Sicasí, la xugada nun-y salió bien al president Mas, que vio como pasaba de sumar 62 escaños nel 2010 (38,43 por cientu del total de votos) a 50 anguaño (30,68 por cientu). El gran beneficiáu de la escalada independentista foi la coalición ERC-Cat Sí, que consiguió doblar el resultáu de los republicanos catalanes hai dos años: pasa de 10 escaños (7 por cientu) a 21 (13,68 por cientu).

La tercera formación nacionalista nel Parlament va ser la Candidatura d’Unitat Popular (CUP)-Alternativa de Esquerres, que da’l saltu a la Generalitat tres un gran trabayu nos municipios. Sumó 3 escaños (3,48 por cientu). Por contra, el gran perxudicáu foi Solidaritat Catalana per la Independència (SI), que se queda fuera del arcu parllamentariu al perder 56.000 votos y los 4 escaños qu’algamó nel 2010: pasa d’un 3,29 por cientu del total a un 1,28 por cientu.

No que respeuta a los partíos españolistes, el más votáu foi’l PSC, que na campaña eleutoral apostó por un discursu federalista. Los socialistes perdieron 8 escaños pa situase en 20: d’un 18,38 por cientu de los votos nel 2010 pasó a un 14,43. Mentes, el PP mantuvo unos resultaos similares que-y permitieron sumar un escañu más: de 18 (12,37 por cientu) a 19 (12,99 pro cientu). Mentes, Ciutadans-Partido de la Ciudadanía protagonizó una medra más que destacable al algamar 9 diputaos (7,58 por cientu), seis más que nes eleiciones anteriores (3,39 por cientu). Hai que destacar que’l partíu d’Albert Rivera algamó 8 de los 9 escaños na provincia de Barcelona; el restante ganólu en Tarragona.

La fuercia que completa l’arcu parllamentariu catalán ye ICV-EuiA, que tamién ameyoró los sos resultaos: pasa d’ocupar 10 escaños (7,37 por cientu) a sumar 13 (9,89 por cientu). Otru datu a destacar de les eleiciones catalanes ye l’aumentu de la participación en 11 puntos, anque ésta tampoco pue considerase mui alta: 69,56 por cientu. El porcentaxe de votos nulos foi del 0,88 por cientu (0,71 por cientu nel 2010) y en blancu, del 1,45 por cientu (2,91 por cientu).