El soberanismu algama un resultáu históricu n'Euskadi y el PSE decide

EH Bildu, que xube 6 escaños, y EAJ-PNV, la formación más votada, sumen dos tercios del electoráu. Los socialistes ameyoren cifres y tienen la llave de la Lehendakaritza.

Gran resultáu del soberanismu vascu nes eleciones nacionales. Si nel 2020 algamaba 52 escaños de los 75 del Parllamentu, 31 d'EAJ-PNV y 21 d'EH Bildu, ayeri aumentaron a 54 al empatar entrambes formaciones a 27.

Los ganadores en sofitos, col 100 por cientu escrutáu y a falta de contabilizar el votu esterior, foron los conservadores con 370.554 (35,22 por cientu) polos 349.960 (32,48 por cientu) de la coalición d'izquierda. EAJ-PNV aumenta en votos, pero baxa en porcentaxe al contar nel 2020 con un 39,07 por cientu, mentes qu'EH Bildu, que foi ayeri la formación más votada en Gipuzkoa y Araba y rexistró lo meyores resultaos de la so historia, tuvo naquella cita un 27,86 por cientu.

El sociu de gobiernu, el PSE-EE, ameyoró'l resultáu al pasar de 10 a 12 escaños, con un 14,22 por cientu del total (13,65 por cientu va trés años. Eneko Andueza va tener la llave de la Lehendakaritza, anque too paez indicar que va reeditase l'alcuerdu ente socialistes y EAJ-PNV, polo qu'Imanol Pradales sería'l nuevu lehendakari.

Tamién ameyoró'l PP, pasando de 6 a 7 diputaos (d'un 6,77 por cientu a un 9,23), mentres qu'entra nel Parllamentu per primer vez Sumar (3,34 por cientu) con un escañu por Araba. VOX caltién la so representación, pasando d'un 1,96 a un 2,03 por cientu, al reeditar el diputáu por Araba.

El gran derrotáu de les eleiciones ye Elkarrekin Podemos, que pierde los sos 4 escaños. Algamó un 2,25 por cientu del total, pol 8,05 del 2020.

No que respeuta a la participación, foi del 62,52 por cientu, superior a va 3 años, en plena pandemia, cuando quedó nel 50,78 por cientu. El 0,73 por cientu de los voto foron nulos y el 0,98, en blanco. 

Na semeya, Pradales y el candidatu d'EH Bildu, Pello Otxandiano, celebren el resultáu d'ayeri.