“El so problema ye un complexu d’inferioridá de sentimientu d’asturianía”, diz Barbón a Blanco

Ignacio Blanco, voceru de VOX, nun apara na so cruzada contra l’asturianu y la so primer entruga na Xunta Xeneral al presidente Adrián Barbón foi sobre l’idioma. “El so problema ye un complexu d’inferioridá de sentimientu d’asturianía” respondió-y el socialista.

La pregunta concreta yera “¿está usted dispuesto a llevar el uso del bable en la Junta General del Principado de Asturias hasta tener que contar con intérpretes en esta Cámara?”, que presentó tres soltar delles falsedaes sobre la llingua asturiana y la realidá sociollingüística del país. “Mire, el so problema, y voi dicilo en sede parllamentaria, nun ye un problema sobre la oficialidá, créame, nin tan siquier cola llingua. Ye muncho más grave entovía. Ye un complexu d’inferioridá de sentimientu d’asturianía. Eso ye lo que vusté siente”, contestó Barbón.

“Vusté cree que cuando uno reivindica la so asturianía lo que ta negando ye la so españolídá”, siguió’l presidente, que punxo d’exemplu nesi sen al gallegu Manuel Fraga. “Reivindique la so asturianía, nun tenga mieu nengún”, recomendó-y darréu a Blanco, al igual que “nun facer el ridículu”, en referencia al “espatuxe” que protagonizara enantes na Cámara.

Por último, apuntó que “a min nun preocupa esta retafila d’argumentariu nin que dedique la so entruga a intentar tensionar lo que nun esiste –esa tensión na cai–. A min lo que me preocupa ye l’efeutu contaxu nos otros partíos de la derecha, y, particularmente, l’otru día montó’l so particular club de la comedia na Conseyería de Cultura y consiguió, por exemplu, como’l milagru de los panes y los pexes a la inversa, qu’una diputada, que se cubrió de gloria, y nun va con segundes, pasara d’entender perfeutamente l’asturianu y lleer, nesti casu poemes de Berta Piñán, a nun ser quien a comprendelu. Eso ye lo que quieren”.

Semeya obra d'Armando Álvarez.