El SNL de la Mancomunidá d’El Cabu Peñes entama una esposición de dibuxos de Villa Costales

El Centru Polivalente La Baragaña, en Candás, acueye una esposición de dibuxos de Sidoro Villa Costales dende esti miércoles hasta’l 18 de mayu. Nel llugar tamién van mostrase campañes infantiles entamaes pol SNL d’El Cabu Peñes.
 
L’escritor, ilustrador y profesor de Primaria sierense, autor d’obres como ‘Nun-yos tengas perceguera’ o ‘Mael al debalu’, ente otres munches, presenta nesta muestra dellos dibuxos que tuvieron como destín dalgunos de los sos llibros o otros trabayos empobinaos tanto al públicu mozu como al adultu. Dellos cuadros y ilustraciones que permiten conocer el llabor artísticu de Villa Costales.
 
La muestra complétase cola instalación de delles meses nes que s’espones los materiales de les campañes entamaes pol Serviciu de Normalización Llingüística (SNL) de la Mancomunidá d’El Cabu Peñes que tán destinaes al públicu infantil. Amás, una d’elles va tar dedicada a los poetes asturianos de la Ilustración por mor de la XXXIII Selmana de les Lletres Asturianes, qu’esti añu ta dedicada a esti periodu de la historia.