El SNL de Candamu entama en Cueru una xornada sobre la cultura alredor del vinu

Va consistir nun alderique y un conciertu.

'Cultura alredor del vinu' ye'l nome de la xornada que va entamar esta tarde'l Serviciu de Normalización Llingüística de Candamu, puestu en marcha recién en comuña col conceyu vecín de Grau. L'oxetivu d'esta iniciativa ye tratar el tema del vinu "como ún de los atractivos culturales y sociales del conceyu", amás de poner en valor "la tradición vitivinícola na zona", dientro del enfotu d'esti SNL de "promocionar la llingua asturiana como bien d’interés común del conceyu ya como dinamizador de la zona rural, pues la llingua ya’l desarrollu social pueden dir de la mano ya’l factor llingüísticu pue mover la economía d’una zona".

La mesa redonda 'El vinu de Candamu ya la redolada' va abrir les actividaes a les 19.30 hores nel Centru Social de Cueru. Nella van participar espertos y espertes na materia como Loli Loureiro, doctora en Ciencies Biolóxiques y investigadora responsable del Plan Esperimental pal Desarrollu de la Vitivinicultura n’Asturies; Javier Fernández Conde, caderalgu d’Historia Medieval; Manuel Ángel López, responsable de Viveros Candamo y espertu nel desarrollu vitivinícola actual del conceyu; y Beatriz Pérez, presidenta de la DOP de Cangas del Narcea y responsable de la Bodega Vidas, que van aldericar de les esperiencies n’otros sitios d’Asturies respeuto al vinu y de la tradición vinera de Candamu, amás de rellatar cómo ta trabayándose anguaño la recuperación de les cepes.

Va completar la xornada un conciertu del tríu Tuenda, formáu por Xosé Antón Fernández 'Ambás', Pepín de Muñalén y Elías García, a partir de les 21.30 hores nel chigre Ca Libertá. L'asistencia ye de baldre.