El sindicatu SUATEA pide que se faiga una llei asturiana d’enseñanza

El sindicatu asturianu d'enseñanza SUATEA emitió un comunicáu en que-y pide al Conseyeru d'Educación José Luis Iglesias Riopedre que lleve alantre l'anuncia que fexo esti día na Xunta Xeneral del Principáu proponiendo la creación d'una Llei d'Educación propia p'Asturies.

Suatea camienta qu'esta llei tien de ser la "oportunidá pa entornar y iguar la política de privatización de la enseñanza entamada pola Conseyería d'Educación que dirixe'l señor Iglesias Riopedre". El sindicatu enfótase en qu'una midida d'esta triba puea anular el "incumplimientu de les promeses del gobiernu tripartitu asturianu de que la enseñanza pública diba ser la so prioridá". Pa SUATEA, lloñe de cumplise esa promesa, la política educativa asturiana ta valiendo pa da-y más privilexos a la rede concertada.

El sindicatu congráciase d'otra manera del nomamientu de la nueva Ministra d'Educación Mercedes Cabrera y cuida que va facer por escaecer l'alcordanza de la so predecesora nel cargu , Mª Jesús Sansegundo, a la qu'acusa de nun tar "a l'altura de lo que se contaba d'ella" y de "nun ser capaz d'aplicar el programa del PSOE, faciéndo-yos concesiones inesplicables a les patronales educatives y la ilesia católica".