El Sindicatu SUATEA denuncia que’l curriculum de secundaria oficializa la marxinación del asturianu

Mientres la polémica pola situación de la llingua asturiana n'educación primaria sigue encesa, el pasáu vienres la Conseyería d'Educación presentaba'l pasáu vienres el proyectu de Currículu de Secundaria. Según denuncia'l sindicatu SUATEA, que fexo una primer llectura crítica del documentu "como lo que pasó en Primaria, l'asignatura de Llingua Asturiana sal fuertemente debilitada". SUATEA afirma que'l documentu qu'apauta les condiciones d'enseñu del asturianu nos institutos supón "perder, otra vuelta más, la oportunidá de dar pasos alantre pa la dignificación del idioma asturianu" y afirma que "de siguir esta propuesta de la Conseyería, taríen en peligru cientos de puestos de trabayu".

Nel nuevu frente de batalla que s'abre pal sindicatu d'enseñanza dientro de los institutos, rescamplen dellos puntos que son especialmente críticos. En primer llugar SUATEA denuncia que "s'oficialíza la situación d'optatividá" y que esto "entra en contradicción col espíritu de la Llei d'Usu qu'especifica que la llingua asturiana ha ser voluntaria" colo que sigue compitiendo con otres, como'l francés, ello al empar que se denuncia que les dos hores que s'acuten p'asturianu nel curriculum son "insufientes pal desenrollu del currículu de l'asignatura.

SUATEA ve que, d'otra manera, "el tratu que se-y da a la llingua asturiana en currículu de llingua castellana y lliteratura ye ambiguu a costafecha, en nengún momentu se trata de la realidá llingüística d'Asturies". Ello quier dicir que los estudiantes que nun quieran garrar asturianu van recibir una información parcial sobre la llingua asturiana, permitiendo que se perpetúen mitos como'l que l'asturianu "ye un dialectu del castellanu" según comentaron a Asturies.com fontes del sindicatu.

Otru de los puntos negros de la propuesta curricular al paecer de SUATEA ye que, nel casu de que los estudiantes que precisen de clases de refuerzu o apoyu, estes salgan de les clases de la materia optativa, nesti casu d'asturianu, una posibilidá que nun se ve dende SUATEA, que pide qu'eses hores se garren de relixón o d'educación pa la ciudadanía.

Como nel casu del documentu de primaria, SUATEA pide la retirada inmediata del proyectu, y una nueva redacción "pa que se dea un tratu xustu y dignu al idioma asturianu y, d'esta manera, garantizar los puestos de trabayu que cuerren peligru de desapaición" y que, al paecer del sindicatu, solo se garantizaríen cola oficialidá del asturianu.

Más información: propuestes pal asturianu en secundaria - documentu de la Conseyería d'Educación.