El SIMPA fala d’un “siguimientu absolutu del paru” pese a unos servicios mínimos “abusivos”

El Sindicato Médico Profesional de Asturias (SIMPA) calificó los datos daos pol SESPA de la primer xornada de fuelga de “simple maquillaxe”. Los médicos falen d’un “siguimientu absolutu del paru”, que continúa esti martes.

Carlos Fernández Moro y Ángel Colmeiro, presidentes de les seiciones d'Atención Primaria y Especializada del SIMPA, de manera respeutiva, señalaron que "más allá de la tradicional guerra de cifres", los datos apurríos pol Serviciu de Salú del Principáu d’Asturies (SESPA) son "simple maquillaxe". Dende l’organismu cifraron el siguimientu de la primer xornada de la fuelga nun 7,87 per cientu, pero los profesionales mantienen qu’ésti foi “absolutu” y espliquen esi datu pola “imposición d'unos servicios mínimos abusivos". Ello ye que sostienen que mientres el periodu del paru de media xornada, ente les 8 y les 11.45 hores, l'asistencia foi similar a la d'una fin de selmana.

El SIMPA defende que nos hospitales fixóse ayeri tola actividá urxente y preferente, pero suprimióse l'asistencia en quirófanos y consultes esternes. A manera d'exemplu señalen que l'Hospital Universitariu Central d'Asturies (HUCA) suspendió'l 100 por cien de l'actividá programada n'Uroloxía, Ciruxía Xeneral, cola esceición de los procesos preferentes, Oftalmoloxía o Ciruxía Infantil. Esta cifra foi del 75 per cientu en Traumatoloxía, del 60 per cientu en Xinecoloxía y del 50 per cientu en Neurociruxía, Ciruxía Mayor Ambulatoria, Vascular y Otorrinolaringoloxía. "El buque insinia de la sanidá asturiana ye namás un exemplu d'un patrón que se cumplió tamién pal restu de los hospitales", sostién el SIMPA. N'Atención Primaria, según el sindicatu médicu, el siguimientu foi daqué menor, pero la cayida de l'asistencia resultó igualmente significativa teniendo en cuenta que los servicios mínimos pal conxuntu de la rede de centros de salú superaba'l 70 per cientu.

El sindicatu punxo amás en conocencia de los sos servicios xurídicos les presiones sufríes por dellos profesionales por parte de les xerencies y direiciones médiques. El SIMPA recibió mientres tola mañana comunicaciones de médicos forzaos polos responsables del SESPA a realizar más allá de l'actividá que preven los servicios mínimos. Coles mesmes, el SIMPA yá anunció que caltien los paros convocaos en ratificando esti llunes "la nula voluntá negociadora" del SESPA.

Nin SESPA nin SIMPA dieron tovía los datos correspondientes a la segunda xornada de fuelga, pero s’esperen unes cifren asemeyaes a les d’ayer. Mañana, miércoles, tendrá llugar el tercer paru de media xornada convocáu y, si nun s’avanza nes negociaciones, el xueves y el llunes continuará la movilización médica.