El SIMPA convoca doce xornaes nueves de fuelga pal mes d’avientu

La fuelga médica va continuar n’avientu. El Sindicato Médico Profesional de Asturias (SIMPA) anunció esti xueves la convocatoria doce xornaes de paru nueves pal mes próximu y aseguró que’l conflictu va siguir el tiempu que sía necesariu.

El calendariu de paros nuevu inclúi los díes 5, 7, 10, 11, 12, 13, 14, 17, 18, 19, 20 y 21 d’avientu, a los qu’hai que sumar les cuatro xornaes pendientes de payares –tolos llunes, miércoles y vienres del mes–. Al respeuto, el secretariu xeneral del SIMPA, Antonio Matador, incidió en que’l sindicatu tien voluntá de negociar y acabar cuanto antes con un conflictu que nun desea, pero que, na so opinión, supón la vía única de los médicos frente a la posición "inmovilista" del Gobiernu.

En rueda de prensa, Matador apuntó que’l SIMPA ta dispuestu a alcordarlo too, escepto los descansos de les guardies. "Ye daqué irrenunciable pa tolos médicos", aseguró, pa depués afirmar que’l so sindicatu "nun va ceder nin un milímetru" nesi puntu. Amás, criticó la "detestable", y "economicista dafechu", xestión del Serviciu de Salú del Principáu d’Asturies (SESPA) non sólo de la fuelga, sinón del serviciu ordinariu que, diz, ta rexistrando un incrementu nes llistes d’espera.

D’igual forma, el presidente del SIMPA n’Atención Especializada, Ángel Colmeiro, recordó que’l SESPA nun presentó documentos nin marcó una fecha de reunión nueva tres los contautos d’esta selmana, que nun finaron n’alcuerdu. El sindicatu reconoz qu’ésti "ta lloñe", anque confía en que se pueda reconducir la situación pa parar la fuelga lo más pronto posible. Pa ello pide a la Conseyería de Sanidá "que respete’l descansu tres la guardia, aplique la xornada estatal, y arrenuncie de la so pretensión de recuperalu".

El conseyeru, decepcionáu col sindicatu médicu

El conseyeru de Sanidá, Faustino Blanco, manifestó esti xueves que dende l'Alministración sienten "decepción" pola actitú de la cúpula sindical de los médicos énte les negociaciones, dao que "cada vez que se da una meyora nel acuerdu siempre se produz un fechu o circunstancia que torga concretar". Llamentó que nel día d'ayeri, enantes de sentase dambes partes na mesa negociadora, el SIMPA volviera marcar una llinia colorada insuperable, nesti casu col asuntu del descansu tres la xornada de guardia. "Yo creo que tenemos qu'olvidamos yá de llinies coloraes y ser quien a negociar d'una manera global", dixo.

"Nós avanzamos continuamente en tolos puntos y cuando mos averamos d'una manera nidia hai un retrocesu pela so parte que nun llegamos a entender. Creemos que los profesionales precisen yá conocer la negociación. Nun vamos renunciar al diálogu profesional", insistió'l conseyeru, que manifestó que dende'l Gobiernu hai total interés en llegar a un alcuerdu tanto nesi asuntu como nel restu.