El SIMPA afirma que los médicos en fuelga reciben presiones de xerencies y direiciones médiques

Esti xueves cúmplese la cuarta xornada de fuelga médica na sanidá asturiana. El Sindicato Médico Profesional de Asturias (SIMPA) denunció la esistencia de presiones a los fuelguistes dende les xerencies y direiciones médiques.

"En llugar d’investigar la suspensión d’actos quirúrxicos, qu’investigue les presiones", recomendó’l sindicatu médicu a la xerencia del Serviciu de Salú del Principáu d’Asturies (SESPA) al traviés d’un comunicáu nel que tamién llamenta los perxuicios posibles que los paros pudieran causar a los pacientes. D’igual forma, señaló qu’aquellos enfermos con patoloxíes urxentes y preferentes son atendíos con total normalidá. Al nun haber nin alcuerdo nin negociaciones ente les dos partes, el llunes próximu va continuar la fuelga a media xornada. Nel momentu de la convocatoria, los médicos anunciaron estos cinco díes de paru cola intención de, nel casu de nun llegar a un entendimientu, ampliar el paru a xornada completa a finales d’ochobre, tres la convocatoria de fuelga de los sindicatos sanitarios que principia’l martes.

Otra manera, el SESPA situó’l siguimientu del paru nun 5,81 por cientu na xornada de güei, el más baxu de les cuatro xornaes de fuelga. El llunes la cifra facilitada pol organismu foi del 7,87 por cientu; el martes, del 5,97 por cientu; y ayeri, del 6,73 por cientu.