El Sidracrucis 2011 y el Primer Sidre l’Añu yá calienten motores

La Selmana Santa n’Asturies va venir cargada de folixes cola sidra como protagonista. La revista La Sidra entama dos eventos qu’atraen a munchos aficionaos: el Sidracrucis y el Primer Sidre l’Añu, que repite nel Muséu del Pueblu d’Asturies.
 
El Sidracrucis, “la folixa más sidrera de toles qu'esisten”, va celebrase’l vienres 22 d’abril y nella pueden participar tolos aficionaos a un preciu de 40 euros, 35 pa los soscriptores de la revista. Esti eventu consiste “nun esforzáu percorríu de chigre a chigre y de llagar en llagar, con sidre asgaya, pinchinos, dos espiches, música asturiana a cargu del gaiteru oficial Pelayu Cuaya y de toos aquellos que s'animen a llevar gaita, acurdión o panderu, o con ganes de canciar”, señalen dende la publicación especializada.
 
La ruta programada esti añu va salir al meudía del Barriu la Sidra xixonés y del Camín Rial de la Sidra, en Cualloto, con parada en dellos llagares y na Sidrería Villa Condal de Noreña. Pa zarrar la xornada, a les 22 hores, los autobuses del Sidracrucis van llevar a los sidreros al Muséu del Pueblu d’Asturies pa siguir cola folixa nel Primer Sidre l’Añu. Como novedá pa esti añu, la organización del Sidracrucis va facer dos grupos con percorríos diferentes pa mayor comodidá de los asistentes. Los interesaos en participar nesti eventu han de reservar con antelación na direición info@lasidra.as yá que suelen escosase les places tolos años.
 
L’otru eventu entamáu por La Sidra pa Selmana Santa ye la segunda edición del Primer Sidre l’Añu, que va celebrase del 21 y 24 d’abril. Tres l’ésitu del añu pasáu, cola asistencia de 5.000 perosnes, el festival medra en díes, actividaes y participación de llagares. Una cita que quier convertise nun clásicu d’estes feches y de la que pronto van conocese más detalles.