El Seya más grande

Güei vívese la fiesta de les piragües. Lo mesmo no deportivo que na folixa qu'arrodia tolos años la preba, el Seya del 2005 va dexar pequeños tolos calificativos.

No deportivo, l'interés de la preba, que tien apuntaos 821 piragüistes de 19 naciones
va tar en ver si l'asturianu Manuel Busto consigue la revancha contra la pareya cántabro-zamorana Martínez y Merchán, vencedores de les siete últimes ediciones. L'añu pasáu Martínez y Merchán ganaron el descensu nun emocionante final contra los campeones del mundu de k-2 maratón, l'asturianu Manuel Busto y el vascu Oier Aizpurua, a los que'l cantabru y el zamoranu adelantaron na mesma ría de Ribeseya baxando de la piragua y carretándola al llombu un cachu de cerca de 50 metros, consiguiendo asina ventaya abondo pa que la pareya vasco-asturiana nun pudiere allegase a ellos. Los árbitrios federativos diéron-y el preste a la maniobra, que podría repetise güei.


No tocante a la folixa, la ufierta de conciertos qu'acompañaron ayeri en Les Arriondes la nueche enantes al descensu llamaron a un públicu numberosu enforma, con más de 300.000 persones na capital de Parres según datos de Protección Civil. El dispositivu de seguridá qu'acompaña anguaño la fiesta de les piragües tampoco nun tien comparanza cola d'otros años, y ello ye que más de 400 axentes de distintos cuerpos controlen el recorríu y les zones d'acampada, incluyendo policía montada y helicópteros. Nes intervenciones y controles que se fexeron ayeri dientro d'esti dispositivu rescampla la detención en Ribeseya d'una persona que carretaba 15 kilos de hachis nuna mochila.