El SESPA sitúa’l siguimientu de la fuelga médica nun 7,87 por cientu

La fuelga convocada pol Sindicato Médico Profesional de Asturias (SIMPA) tien un siguimientu del 7,87 por cientu, según datos aportaos pol SESPA. Les dos partes aconceyaron esti llunes, ensin llegar a alcuerdu nengún.

El Serviciu de Salú del Principáu d’Asturies (SESPA) cifra nel 1,3 por cientu’l paru n’Atención Primaria y nel 11,07 por cientu n’atención especializada. El datu ponderáu de siguimientu nel conxuntu de la sanidá pública asturiana ye del 7,87 por cientu. N’atención hospitalaria, la incidencia mayor concentróse na área sanitaria V, con cabecera en Xixón, con un siguimientu del 26,7 por cientu, y la menor na II, con cabecera en Cangas del Narcea, con un 1,82 por cientu.

Del total de los profesionales d’atención especializada que secundaron la convocatoria de güei, el 34 por cientu son médicos interinos residentes (MIR). Esta circunstancia ye significativa nel Hospital de Cabueñes, onde los MIR representen el 56 por cientu de los trabayadores en fuelga. N’Atención Primaria la mayor incidencia de la fuelga tamién se rexistró na área V, con un siguimientu del 2,7 por cientu, y les menores nes áreees VI, VII y VIII, nes que nun hubo nengún médicu en fuelga.

El paru va continuar mañana tres el fracasu de la reunión d’esta mañana de los representantes sindicales cola xerente del SESPA, Celia Gómez. "Tres una xunta onde namá se faló de filosofía de los servicios sanitarios, nun hai nenguna propuesta enriba de la mesa pa valorar una negociación al respeutive", apuntaron dendel SIMPA, que pidió a la opinión pública comprensión. Espliquen que llegaron a la fuelga como "últimu recursu”. Sobre los datos de siguimientu de la fuelga, el sindicatu nun aportó tovía les sos cifres, anque los médicos culpaben a los altos servicios mínimos impuestos dende’l SESPA, del 70 por cientu, de la baxa participación.