El SESPA nun evita la fuelga sanitaria, que principia esti martes

La reunión ente’l Serviciu de Salú del Principáu d’Asturies (SESPA) y los sindicatos sanitarios nun llegó a bon puertu y el martes va principar una fuelga nueva. Tán convocaes ocho xornaes de paros na sanidá asturiana.

Tres la fuelga entamada polos 4.000 médicos asturianos, agora llega’l turnu de los 16.000 trabayadores de la sanidá asturiana que protesten pola forma na que’l Gobiernu aplica l’incrementu de la xornada del personal sanitariu. Los sindicatos convocantes son SATSE, USAE, SICEPA/USIPA, CC OO y UXT, que tuvieron zarraos per un mes na sede del SESPA como protesta. Afirmen que nun-yos queda otru remediu tres el “inmovilismu” amosáu pol Executivu. Los díes de fuelga van ser el 16, 17, 18, 19, 23, 30 y 31 d’ochobre y el 5 de payares.  

Otra manera, güei tuvo llugar l’últimu día de fuelga del Sindicato Médico Profesional de Asturias (SIMPA), que tuvo un siguimientu del 5,1 por cientu –0,6 por cientu n‘Atención Primaria y del 7,2 por cientu n’Atención Especializada–, según los datos aportaos pol SESPA. Énte la falta d’alcuerdu ente les dos partes, tán previstos paros nuevos, nesta ocasión de xornada completa, los díes 24, 25, 26 y 29 d’ochobre.