El Serviciu de Normalización de Siero presentó cuatro campañes pa esparder l’usu del asturianu

|

Al igual qu’otros servicios de normalización del país, el de Siero entamó a trabayar esta selmana en delles campañes de promoción del asturianu. Éstes tán destinaes a escolinos y hostelería, y al fomentu del reciclaxe y la igualdá.
 
Mauricio Adrián Bogomak Medeiro, conceyal de d'Educación, Cultura, Deportes, Turismu y Seguridá Ciudadana, encargóse de la presentación d’estes cuatro campañes nes que collabora la Rede de Normalización Llingüística nos Conceyos y que se faen gracies a les sovenciones de la Conseyería de Cultura y Turismu. Xunto cola Oficina Municipal de la Llingua de Xixón y los servicios d’Aviles, mancomunidá del Cabu Peñes, Cangas, mancomunidá de la Sidra, Corvera, Llaviana, Ḷḷena, Mieres y Samartín del Rei Aurelio, Siero entama la campaña ‘N’asturianu queda guapu’, orientada a escolinos y escolines, que tien como oxetivu dar a conocer los nomes n’asturianu de plantes, animales y prendes de vistir.
 
Mentes, ‘Na igualdá, ¡tas que ruempes!’, pretende fomentar ente la mocedá l’usu del asturianu y los valores de la igualdá. Ésta ta destinada a alumnos y alumnes de la ESO, con prioridá pa los de llingua asturiana, y se compón d’un cartelu de la campaña, dos modelos de pegatines, cuartiyes de tamañu A5 con un decálogo pa mercar xuguetes non sexistes, camisetes y dos tipos de chapes. Siero entama esta campaña en collaboración colos servicios de la mancomunidá de Cabu Peñes, Avilés, Cangas, Llaviana, Ḷḷena, Samartín del Rei Aurelio y Mieres. Pela so parte, ‘Nós reciclamos n’asturianu’, na que tamién trabayen la mancomunidá de Cabu Peñes, Cangas, Llaviana, Ḷḷena y la mancomunidá de la Sidra, tien como oxetivu promocionar la nuesa llingua al empar que los valores medioambientales y el reciclaxe. Esta campaña, que ta compuesta por un cartelu esplicativu, llibretines con información medioambiental y tres modelos de bolses con conseyos pal reciclaxe, ta destinada también pa xente adulto y se reparte nel mesmu Serviciu de Normalización Llingüística de Siero.
 
Por último, la cuarta campaña ta enfocada a la hostelería y tien como temática la sidra. ‘La sidra, d’Asturies’ busca caltener los términos y la riqueza espresiva referente a la bébora tradicional del país, que ta reculando delantre l’avance del castellán y el vocabulariu proviniente del vinu. Pa ello, el Serviciu de Normalización sierense va repartir ente los chigres de Siero, conceyu sidreru por escelencia, un cartelu con frases relacionaes cola sidra, llibretinos de 18 fueyes explicando dellos aspeutos de la cultura sidrera y pegatines pa los ‘nunmechisques’. Nesti casu, Siero trabayó xunto colos servicios de la mancomunidá de Cabu Peñes, Llangréu, Ḷḷena, Mieres y mancomunidá de la Sidra.

Contador Estadistiques