El Serviciu de Normalización de Siero entama actividaes alredor del asturianu

El serviciu de normalización llingüística de Siero entama pa estos díes delles actividaes, les más d'elles empobinaes a la reciella. Les actividaes emprimen esti vienres 9 a les 7 de la tarde cola presentación na Casa de Cultura de La Pola de dos llibros, el primeru d'ellos ye'l volume "II informe asturianu sobre los derechos humanos en Colombia" que va presentar el sindicalista colombianu Javier Orozco. Una hora dempués, a les 8 y tamién na Casa de Cultura de La Pola, va facese la presentación del diccionariu inglés-asturianu d'Inaciu Galán.

Yá pa la selmana qu'entra, la Casa de Cultura de Llugones va atechar una esposición de lliteratura infantil n'asturianu, contando amás con delles actividaes alredor de la mesma. Asina, el martes 13 va haber taller de cuentacuentos al cargu del grupu Kaamante Teatro n'horarios de mañana y tarde, mientres que pal miércoles 14 el llabor d'allegá-yos los cuentos a los rapacinos va correr al cargu de Roxelio Crespo, cola actividá "La estrella que subiere al cielu".