El serviciu d'autocares nocherniegos ganó 12.000 usuarios nel 2017

En total 152.110 persones fixeron usu d'esti serviciu del CTA, con diez llinies regulares y servicios especiales en periodos festivos.

La más usada foi la que xune Riañu (Villa) y La Pola Llaviana, con 27.409 usuarios, siguida de la Uviéu-Xixón, con 24.619 pasaxeros. Completen el llistáu de llinies más emplegaes la Piedrasblancas-Avilés-Corvera (20.382), la Xixón-Avilés (16.734), la Uviéu-La Pola Siero (14.129) y la Uviéu-Avilés (13.371).

De los servicios especiales destaquen los 3.778 usuarios de la llinia Avilés-Lluanco mientres dellos eventos del 2017, asina como los 1.953 viaxeros de la llinia Llanes-Naves na festividá de Santa Ana o los 1.494 ente Uviéu-Lluanco en San Mateo, Antroxu y festividá de la capital de Gozón. Nel 2017 el Gobiernu punxo en marcha tamién una ruta nueva ente Uviéu y Grau, que nes principales festividaes de dambes poblaciones foi usáu por 661 persones.

En total usaron esti serviciu del Consorciu de Tresporte d'Asturies (CTA) un total de 152.110 usuarios, 11.678 más que nel 2017, cuando tuvo 140.432 pasaxeros, lo que supón una medra del 7,67 por cientu. El restu de llines regulares esistentes son la Uviéu-Llangréu, la Uviéu-Mieres, la Uviéu-La Fresneda-Llanera y la Xixón-Candás-Lluanco.

Cola puesta en marcha d'estos autocares nocherniegos preténdese amenorgar la siniestralidá vial, amás de dar un serviciu siguíu a la movilidá nel área central y n'otres zones d'Asturies en fiestes concretes. Tán destinaos al conxuntu de la población, que los usa mayoritariamente pa los sos desplazamientos por motivos d'ociu, magar se carautericen por ser emplegaos mayoritariamente por xente mozo, pudiendo pagar col billete únicu o con dineru en metálico.