El SERIDA rexistra les variedaes d'escanda roxa, azul y blanquina

L'equipu de Xenética Vexetal de la entidá escoyó y carauterizó estos trés tipos del cereal.

L'investigador del Servicio Regional de Investigación y Desarrollo Agroalimentario (SERIDA), Juan José Ferreira, esplicó esta mañana a los productores, nel marcu de la Xornada de la Escanda, este trés variedaes nueves. “Conclúi un programa d'ameyoramientu col que s'afiten unes llinies homoxénees d'escanda asturiana bien carauterizaes y diferenciables morfolóxicamente”, afirmó'l responsable del equipu de Xenética Vexetal.

Les trés variedaes, actualmente conservaes nel bancu de granu del SERIDA, pueden distinguise a primer vista poles tonalidaes de coloración que tomen les sos espigues na maduración: nel casu de la blanquina, blanques; nel de l'azul, azulaes; y nel de la roxa, pardes. D'ehi tomen el nome col que se rexistraron caúna d'elles.

Tamién hai diferencies na fuercia de panificación de les sos fariñes: na blanquina y azul ye baxa; na roxa, moderada. Los tipos nuevos de cereal algamáronse de poblaciones llocales y a partir del bancu de granu del SERIDA.

Cereal de tradición n'Asturies

La escanda ye un ceral con fuerte raigón na cultura rural asturiana. La so fariña destinábase, principalmente, a producir pan, anque también s'emplegaba n'otres ellaboraciones, incluyida la repostería.

Ye un tipu de trigu vistíu, mui adaptáu a condiciones dures. La so producción decayó significativamente na segunda metá del sieglu XX cuasi hasta'l desaniciu, pero nes décades últimes vivió un resurdimientu gracies a iniciatives privaes y públiques pa la so recuperación.

Na Xornada de la Escanda, celebrada nes instalaciones del SERIDA en Villaviciosa, valoróse la creación d'una marca de calidá diferencia qu'ayude a la so promoción.

Na imaxe, participantes na Xornada d'Escanda, na que tomó parte'l conseyeru de Ciencia, Innovación y Universidá, Borja Sánchez García. Semeya del SERIDA.