El senador Mulet entruga al Gobiernu estatal pol incumplimientu de la toponimia nes carreteres

Los lletreros nuevos instalaos na N-634 al so pasu per Piloña empleguen nomes de llugar non oficiales como 'Oviedo', 'Infiesto' o 'Campo de Caso', formes derogaes va años.

Llueu d'interactuar con un usuariu en Twitter, Carles Mulet rexistró una entruga al Gobiernu estatal al traviés de la Presidencia del Senáu sobre l'incumplimientu de la toponimia oficial por parte del Ministeriu de Tresportes, Movilidá y Axenda Urbana nesta carretera, una situación que denunció públicamente la Xunta pola Defensa de la Llingua Asturiana (XDLA). Na mesma'l senador de Compromís inclúi la información asoleyada ayeri por Asturies.com y unos párrafos pa poner l'asuntu en contestu, esto ye, l'ausencia del billingüe Oviedo/Uviéu, L’Infiestu y El Campu, úniques formes válides, nos cartelos, y la presencia de topónimos non oficiales.

Por último, el castellonenc plantega dos entrugues: ¿Por qué la Demarcación de Carreteres n'Asturies, la Delegación del Gobiernu y el propiu Gobiernu, nun respeta nesta señalética la denominación oficial de los conceyos asturianos y s'inventen nomes? ¿Qué midíes va adoptar el Gobiernu, y en qué fecha, pa correxir esta situación intolerable?

fechu :-). pic.twitter.com/gGn5exditP

— Carles Mulet Garcia (@carlesmulet) May 19, 2023