El Senáu refuga declarar los toros Bien d'Interés Cultural

|

El Plenu del Senáu refugó colos votos en contra de tolos grupos nun siendo'l PP -promotor de la iniciativa- y UPN, pidir al Gobiernu que declare la fiesta de los toros como Bien d'Interés Cultural.

La propuesta tamién pidía que’l Gobiernu español entamare les xestiones ante la Unesco pa incluyila nel llistáu mundial de Patrimoniu Cultural Inmaterial. Los populares basaben el so doble pidimientu na Constitución Española, trés lleis estatales y una convención internacional.
  
Mientres el debate, García-Escudero faló del toru como "animal míticu, símbolu de fortaleza, valentía y fecundidá". "L'home busca col toru una relación especial intentando llograr el tresvase de delles de les sos característiques. “El más guapu de los animales, Picasso la última metá de la so vida quiso ser toru", argumentó.
  
Coles mesmes, defendió que "el toreru ye un artista como'l pintor, el poeta, el compositor o l'escultor", pero mientres que l'escultor "modela la folla rectificando cuantes veces quiera, el toreru tien qu'improvisar, precisa la inspiración inmediata y nun pue correxir, y en tou momentu ta xugándose la vida".

"El toréu ye espresión artística, ritu, valor históricu y cultural, tradición popular, y un sentimientu y una emoción", sorrayó, y adelantó que'l PP ta "preparando un recursu ante'l TC contra la decisión del Parlamentu catalán d'abolir les corríes de toros".
  
PSOE: "Competencia de les CCAA"

Roberto Lerchundi, del PSOE, recordó-yos al PP que la Llei de Patrimoniu establez que l'Estáu nun ye competente pa declarar una fiesta como la de los toros Bien d'Interés Cultural, dao que ye competencia de les CC.AA, y pidió "nun allabanciar lo que nun ye necesario".

"El toréu acabóse nos noventa en Canaries y nun pasa nada, y hai ciudaes que son antitaurines y nun pasa nada. Nun adoptar midíes populistes que namás crean tracamundiu, como esta moción lesiva pa les CC.AA y despreciable col Senáu", indicó.

Les postures nacionalistes
Per parte de CiU, Josep Maldonado, destacó que muncha xente "nun quier ver les escenes de sufrimientu que se producen nes places de toros", y añadió que "les corríes tán en franca decadencia y esto supón un ampliu refugu popular a esta actividá". "Nun negamos el carácter tradicional y cultural, pero ambes circunstancies nun xustifiquen la crueldá. Nun tien ética y nin apoyu social", señaló, pa dempués sorrayar que "la decisión de Parlamentu de Cataluña d'abolir les corríes de toros aplaudióse internacionalmente".
  
Miquel Bofill, de la Entesa, plantegó que "más allá de la liturxa d'un combate simuláu, nes corríes asístese a la tortura d'un animal tan sensible al dolor como cualquier otru mamíferu". Iñaki Anasagasti (PNV), a lo último, dixo que-y daría "dos oreyes y el rau" al socialista Lerchundi polos sos plantegamientos, "básicamente porque esto ye competencia de les CC.AA".
  
Aceptación tradicional pal PP
Na moción defendida por García-Escudero, faise referencia a los distintos testos lexislativos del ordenamientu xurídicu español, que vendríen demostrar, según el PP, que n'España existe una aceptación xurídica del carácter cultural, históricu y tradicional de la Fiesta de los Toros. Por eso, el PP considera que'l Gobiernu tien que tratar, como pretende la so iniciativa, la reconocencia máxima de la pertenencia de la Fiesta de los Toros al Patrimoniu Históricu, Artísticu, Cultural y Etnográficu d'España.
  
Na so esposición de motivos la moción alude a la reciente prohibición de les corríes de Toros en Cataluña, y a cómo ésta volvió reabrir el debate sobre'l carácter cultural de la Fiesta de los Toros. Un debate, diz la iniciativa, que nun ye nuevu, puesto que de manera más o menos apasionada, dende últimos del sieglu XIX y mientres tol sieglu XX, grandes figures de la intelectualidá viniéronse manifestándose tanto a favor como en contra de la mesma.
 

Contador Estadistiques