El Senáu encamienta al Gobiernu reformar el 'Valle de los Caídos'

El Senáu aprobó col votu en contra del PP una moción pola que plantea al Gobiernu reformar el Valle de los Caídos acordies a la Llei de la Memoria Histórica. Defende convertilo nun monumentu a l'alcordanza de "tolos muertos" na Guerra Civil.

El Plenu del Senáu defendió que sea un monumentu qu’honre la memoría de los muertos de tolos bandos na Guerra Civil y de les víctimes de la represión franquista y nel que se fomenten "les aspiraciones de reconciliación y convivencia" de los españoles. Na moción esíxese amás derogar el decretu de 1957 qu'establez les actividaes del llugar.
 
Namás el PP votó en contra, anque ún de los sos senadores. El voceru del grupu, Juan Van-Halen, defendió l'interés del so partíu por despolitizar el Valle de los Caídos, pero alvirtió qu'ési nun ye l'oxetivu de la iniciativa debatida güei, sinón el d'eliminar l'abadía benedictina y qu'asina lo demuestra la “deriva peligrosa" que'l Gobiernu al so xuiciu tomó sobre'l Valle de los Caídos. El citáu decretu de 1957 dictóse namás pa fundar l'abadía, "nun ye otra cosa".
 
Van-Halen defendió que ye una de les mayores basíliques escavaes del mundu y la segunda pol so tamañu, amás d'ún de los monumentos más visitaos d'España. Y retrucó contra los comentarios d'otros voceros, nos qu'echó en falta conocimientos d'historia.

"Pa nada hubo 27.000 presos (trabayando ellí). Hubo 2.500 y, coles mesmes, namás 700 de cada vez. Nun hubo más que diez muertos en 18 años d'obres. Tolos presos y llibres cobraben el mesmu sueldu y los presos pidíen dir llibremente porque teníen seis díes de permisu. Ye la hestoria, llean poconín, home", espetó.

Otra intervención comentada por Van-Halen y otros voceros foi la del nacionalista vascu Iñaki Anasagasti, que bromió cola posibilidá de dinamitar el Monumentu. "Pero igual, si se vuela, l'hermanu Francisco despierta y nun convién", añadió. "Recuérdame a lo de los budes de Bamiyán de los talibanes", respondió-y Van-Halen.

IU pide cumplir la Llei
Defendió la iniciativa'l senador de la Entesa Joan Josep Nuet (IU), que tampoco compartió'l comentariu d'Anasagasti porque la so intención güei yera llograr l'acuerdu y sorrayar que l'únicu oxetivu de la moción ye esixir al Gobiernu qu'adapte'l monumentu a la Llei de la Memoria.

"Namás", aseguró, pa esclarar que la basílica, la ilesia, tol recintu, puen y tienen que ser compatibles con honrar la memoria de los republicanos y que ye necesario pa ello "cortar el gordón umbilical" ente'l Valle de los Caídos y el franquismu.

El senador, que dedicó la moción y el debate a José Antonio Labordeta, criticó que tres años dempués de la Llei de Memoria Histórica, esi pasu nun se diere. "La llei nun se ta aplicando, siguimos afondando nesa división que'l Valle de los Cayíos cuando se construyó tenía como intención", dixo.

El senador recordó que'l Monumentu ye propiedá del Estáu y que la sociedá tien poro derechu a opinar qué facer con él. Mientres nun s'actúa, aseguró que "los grupos d'ultraderecha tán como quieren" y celébrense "munchos díes" mises nes que se recuerda "al hermanu Francisco". "Nun ye un benedictín, ye'l xeneralísimu Franco", dixo, pa preguntar a los senadores: "¿Imaxínense que na catedral de Colonia se recordare nuna misa al hermanu Adolf?".

PSOE quier fomentar la “reconciliación”
Per parte del PSOE, Enrique Cascallana defendió una enmienda del so grupu a la moción, aceptada por Nuet, y pola que s'inclúi ente los oxetivos de la reforma del Monumentu'l de rehabilitar y honrar a tolos muertos na Guerra y pol franquismu y de fomentar la reconciliación.

Enrique Cascallana recordó cómo se construyó'l llugar y denunció  ente otres coses el treslláu ellí de docenes de cadabres, "xunto al verdugu" y sin consentimientu familiar. Por eso pidió que non sólo s'elimine'l carácter de mausoléu al dictador qu'al so xuiciu tien el valle sinón que s'aproveche pa enseñar la historia a les nueves xeneraciones y fomentar la reconciliación.

Nuna llinia asemeyada espresóse'l senador de CiU Josep Maldonado, que llamentó que seya necesario "da-y un toque d'atención" al Gobiernu por nun tresformar sólo'l Valle de los Caídos. El voceru esixó al Executivu qu'aproveche esta iniciativa pa dir "más allá" y fcaer inventariu de tolos símbolos de la dictadura que queden por retirar del espaciu públicu.