“El seminariu valió pa desmontar munchos mitos sobre la oficialidá”, destaca Inaciu Galán

El Seminariu ‘Oficialidá, el camín constitucional pal futuru del asturianu’ resultó un ésitu, con munchu públicu, una amplia repercusión en redes sociales y intervenciones destacaes que valieron “pa desmontar munchos mitos sobre la oficialidá”. Inaciu Galán apunta que “los partíos siguen nel camín del consensu”.

FSA, Podemos, Izquierda Xunida (IX) y Foro foron los partíos que participaron, convidaos por Iniciativa pol Asturianu, al seminariu celebráu nel Aula Magna del Edificiu Históricu de la Universidá d’Uviéu y inauguráu pol rector Santiago García Granda. Mari Luz Pontón, Andrés ‘Ron’ Fernández Villanova, Concha Masa y Pedro Leal acudieron en representación de les sos formaciones nun alderique entituláu ‘¿Qué modelu d’oficialidá precisa Asturies? Construyendo’l consensu constitucional’ nel que tolos amosaron el so sofitu ensin esceición a la igualdá de derechos de los falantes d'asturianu y castellanu, cola puntualización del diputáu Foro, qu’apuntó que “nun esiste un nivel de consensu políticu y social afayadizu sobre la oficialidá nesti contestu que tamos viviendo”, en referencia al tema catalán.

“Ta claro qu’hai postures más avanzaes y otres menos, pero ye bono que tolos partíos dialoguen”, apunta Galán, que considera “que la oficialidá ha de llegar col sofitu de los máximes formaciones posibles. Toles partes han de siguir viéndose pa siguir avanzando y nós ufrímonos p’ayudar en que siga esi diálogu”. Nesi sen, el presidente d’Iniciativa pol Asturianu cree importante “sacar la oficialidá del debate de día a día pa que pase a tar de fondu, como les pensiones o los derechos de la muyer”.

L’alderique políticu zarró’l seminariu, pero enantes pasaron pela mesa que presidía l’Aula Magna espertos en dellos campos que presentaron intervenciones que “valieron pa desmontar munchos mitos sobre la oficialidá que traten d’esparder el PP y la estrema derecha ente la sociedá asturiana”. Xosé Antón González Riaño, presidente de l’Academia de la Llingua Asturiana (ALLA); Isabel Hevia, profesora y investigadora de Ciencies de la Educación de la Universidá d’Uviéu; José Manuel Pérez Fernández, lletráu del Tribunal Constitucional y profesor de Derechu Alministrativu de la Universidá d’Uviéu; Francisco José Llera Ramo, caderalgu de Ciencia Política de la Euskal Herriko Unibertsitatea, direutor del Euskobarómetro y autor de la III Encuesta Sociollingüística d’Asturies; Xosé Alba, profesor d’Economía Aplicada de la Universidá d’Uviéu; y l’escritor y Premiu Nacional de Lliteratura Asturiana, Xuan Bello, presentaron múltiples argumentos sobre la necesidá d’oficialidá y les sos munches posibilidaes, “ente elles razones económiques mui potentes”.

Estrena d’un documental

El seminariu tamién tuvo espaciu pa un alderique sobre la normalización nos conceyos, nel que tomaron parte Rogelio Pando (PSOE), alcalde de Colunga y presidente de la Mancomunidá de la 'Comarca de la Sidra'; Rosa Morán (IX), conceyala d'Educación de Ḷḷena; Ana López (Foro), edil de Villaviciosa; y Agripino Pérez, conceyal de Compromisu por Ḷḷena, y pa la estrena del documental ‘La vida ensin oficialidá: les consecuencies de la falta de drechos llingüísticos n’Asturies’, producíu a costafecha pa estes xornaes por Iniciativa pol Asturianu y Cuatro Gotes Producciones. Xosé Antón Fernández ‘Ambás’, Ana María Cano, Xuan Xosé Sánchez Vicente, Faustino Zapico o Pablo Pérez, xunto a otres personalidaes y ciudadanos, espusieron nél dellos casos de discriminación llingüística que nun dexaron a naide indiferente.

“Tamos mui contentos del desarrollu del seminariu. Hebo una participación masiva, con xente que tuvo que quedar fuera pese a qu’escoyimos un espaciu d’aforu ampliu”, asegura Galán. En total, inscribiéronse 162 persones, anque l’asistencia foi superior, con públicu de pie na mayor parte de les charres.

D’igual forma, el presidente d’Iniciativa pol Asturianu destaca’l siguimientu qu’hebo en redes sociales, “con más d’un millón d’impautos del hastag #OficialidáEnCamín”. N’Asturies.com fiximos un siguimientu especial a esta xornada nes nueses cuentes de Facebook y Twitter, que pue repasar nestos dos ‘storify’: