El Seminariu de Filoloxía Asturiana de la Universidá va entamar un simposiu internacional n'Uviéu

Los díes 22 y 23 de marzu, Uviéu va acoyer un Simposiu Internacional sobre Variación Sintáctica Dialéctal entamáu pol Seminariu de Filoloxía Asturiana de la Universidá. L’eventu coincide cola reunión añal de la rede d’investigación Wedisyn.
 
Xulio Viejo Fernández ye’l direutor del comité organizador d’esti alcuentru científicu del que tamién formen parte Ramón d’Andrés, Taresa Fernández Lorences, María Cueto Fernández y Roberto Hinojal Díaz que ta enmarcáu nes xornaes que’l Seminariu de Filoloxía Asturiana vien entamando dende l’añu 2006. Nesta ocasión coincide tamién cola reunión añal de Wedisyn, grupu especializáu na sintaxis dialectal de les llingües peninsulares, anque nella tamién participen investigadores d’otros idiomes como’l bretón o l’occitanu. Ésti ta coordináu pola profesora de la Euskal Herriko Unibertsitatea, Beatriz Fernández, y d’él formen parte equipos afines de les universidaes de Santiago de Compostela, Barcelona, Lisboa, Baiona y l’Autónoma de Madrid. Asturies ta representada nella al traviés del Seminariu de Filoloxía Asturiana y, de manera específica, del proyeutu Eslema de corpus llingüísticu.
 
El simposiu internacional, gracies a la collaboración d’esti grupu, va ser una perbona ocasión pa conocer llinies d’investigación llingüístiques que tán siguiéndose n’otres llingües de la redolada y, otra manera, tamién ye importante enforma pa presentar a los espertos procedentes d’otros países lo que se ta faciendo nesti campu temáticu n’Asturies y los planes esistentes pal futuru.
 
Les charres
 
El salón de graos del Departamentu de Filoloxía Española de la Universidá d'Uviéu va ser la sede de toles actividaes, que van principiar el xueves 22, a les 10 hores cola presentación del simposiu, a lo que va siguir una conferencia de Xulio Sosa, de la Universidade de Santiago de Compostela y del Instituto da Lingua Galega, baxo’l títulu ‘Estrategias evidenciales en las variedades del gallego: los marcadores gramaticalizados’. Darréu, a les 11 hores, va ser el turnu de Ernestina Carrilho, de la Universidade de Lisboa, que va falar sobre los ‘Expletivos em línguas de sujeito nulo ibéricas: entre contextos matriz e contextos subordinaos’.
 
Tres una posa, a les 12.15 hores va intervenir Víctor Lara, de la Universidad Autónoma de Madrid, con una charra sobre les ‘Concordancias de un cambio lingüístico: el acusativo versus el dativo en el uso de voces como único alocutivo de plural en el portugués europeo’, y, a les 13 hores, Ramón d’Andres cola ponencia ‘Variación sintáctica y transición lingüística entre asturiano y gallego’. Mentes, pela tarde, a les 16 hores, va intervenir Francisco Fernández Rubiera, de la Universitat d’Alacant, pa falar de ‘La conexión germánico-románica: los fenómenos matriz en contextos subordinados’; a les 16.45 hores, María Cueto sobre’l ‘Leísmu, laísmo y loísmu nel noroeste de Llión’; y a les 17.30 hores, Xulio Viejo sobre ‘Determinación, especificidad e indefinitud en los determinativos asturianos’.
 
La segunda y cabera xornada del simposiu va tar dedicada al eusquera y va abrise, a les 11 hores, cola intervención d’Ane Odria y Ane Berro, de la Euskal Herriko Unibertsitatea, que van dar una conferencia n’inglés entitulada ‘Intransitivization of reflexive and reciprocal predicates in basque. The case of bivalent ditransitive predicates’. Mentes, a les 11.45 hores, la tamién profesora vasca Beatriz Fernández, xunto con Milan Rezac, del CNRS-Université de Paris 8, van falar del ‘Marcado diferencial de objeto en las variedades del euskera’, y a les 12 hores, Ricardo Etxepare, del IKER UMR 5478-CNRS Baiona, va tocar el tema de les ‘Partículas evidenciales en vasco: de la variación a la teoría’. El pieslle de les xornaes ta previsto pa les 13 hores.