El selmanariu n'asturianu 'Les Noticies' cumple 15 años de vida

L’únicu periódicu impresu escritu de forma íntegra n’asturianu, 'Les Noticies', cumple 15 años de vida. Pa celebrar esti aniversariu tán especial, esti vienres sal a la cai un númberu especial del selmanariu con 32 páxines a too color.
 
Una entrevista al presidente d’Asturies, Francisco Álvarez-Cascos, abre esti númberu, el 752 d’esti selmanariu nacíu hai 15 años pa ocupar un espaciu inesistente hasta la fecha: la presencia d’un periódicu escritu dafechu n’asturianu. Güei, 15 años depués, 'Les Noticies' nun faltó nin una sola selmana a la so cita de los vienres colos llectores.
 
Esta edición aniversariu del selmanariu tamién inclúi un reportaxe sobre la presencia del asturianu nos medios de comunicación dende l’apaición de ‘Ixuxú’ nel 1901, la influencia qu’algamó l’asturianismu nestos años últimos, la evolución del nacionalismu asturianu contestualizao con otros movimientos asemeyaos nel Estáu español, les perspectives de futuru del sector agroalimentariu asturianu o un análisis sobre la situación actual del asturianu na Universidá. Delles entrevistes –a Antón García y a José Ángel Hevia– y análisis, y un bon puñáu de columnes d’opinión completen esti númberu de 'Les Noticies'.