El Salón de Teatru Costumista Asturianu de Candás cumple 30 ediciones

|
Cartelu del XXX Salón de Teatru Costumista Asturianu

Una docena d’obres, de les que seis son estrenos absolutos, conformen el programa del Salón de Teatru Costumista Asturianu, que vive la so trentena edición. El certame va arrancar esti miércoles en Candás, con funciones nel Teatru Prendes tolos díes hasta’l 30 que los sábados y domingos van ser dobles.

La crisis sanitaria pola pandemia de COVID-19 nun pue col teatru costumista asturianu, que vive en Candás tolos años el so gran alcuentru. El Conceyu de Carreño entama nel Teatru Prendes, con toles midíes de seguranza, el Salón de Teatru Costumista Asturianu, qu’acueye dende hai 30 años los principales estrenos de les compañíes del país.

Nesta ocasión presenta un total de siete, de les que seis van ser absolutos: el sábadu, ‘Confinaos’, obra escrita por José Ramón Oliva y representada por Teatru Carbayín; ‘Telva y Pinón’, el domingu, de Sergio Buelga pola Compañía Asturiana de Comedias; una ‘Noche de sainetes’ el llunes cola participación de les compañíes Carbayín, San Félix, Padre Coll y Chanclos Asgaya; ‘Dos suegres y un destín’, de Carmen Campo que va poner n’escena’l xueves 27 Santa Bárbara Teatro; ‘La consulta del Dr. Mateo’, el sábadu 29, d’Oliva pa Teatro El Hórreo; y, pa poner el ramu al Salón, ‘Arsenio’ el domingu 30, del propiu Oliva y Arsenio González que va representar el Grupo Rosario Trabanco. A ellos hai que sumar, esti vienres, l’estrenu en Candás de ‘Doña Josefa’, del Grupo de Teatro La Cruz de Ceares.

La primer representación, mañana, va correr a cargu de Carmen López Teatro, con ‘Púnteme al Fisbur’, pa siguir el xueves con ‘¡Ai, si fuera asina!’, de Padre Coll. Completen el Salón ‘La criada de tayuela’, de Garrapiellu (martes 25) y ‘D. Cipriano, cura de pueblu’, de Carbayín (miércoles 26).

Toles representaciones son a les 23 hores, cola esceición de les del sábadu y el domingu, cuando va haber doble función: a les 20 y a les 23 hores. Les entraes son a 6 euros –a 4 pa los socios–, que se van poner a la venta’l mesmu día nel Prendes 60 minutos enantes del entamu de la obra.

Esposición y gala de los XVIII Premios Aurora

Candás tamién va acoyer, un añu más, la entrega de los Premios Aurora del teatru asturianu. Ésta celébrase tres el Salón, nesta ocasión el 4 de setiembre a les 21 hores col espectáculu ‘La gala suañada d’una nueche de branu’ que firma Alain Fernández.

Amás, dende’l pasáu día 1 d’agostu y hasta’l 30 de setiembre, ta a disposición del públicu la esposición ‘Aurora Sánchez, la gran dama del teatru asturianu’.

Contador Estadistiques