El sacerdote Javier Fernández Conde camienta que la Ilesia ha facer mises n’asturianu

Javier Fernández Conde, cura de la Ilesia Católica asturiana y caderalgu d'Historia Medieval de la Universidá d'Uviéu, declaró nuna entrevista qu'espubliza güei'l diariu de Xixón "El Comercio" que la Ilesia Asturiana ha asturianizase tanto na formación del so cleru como n'adoptar l'asturianu como llingua de lliturxa.

Les declaraciones del sacerdote asturianista apaecen nuna entrevista na que Fernández Conde fala sobre'l momentu pel que pasa la Ilesia Asturiana, que ta preparándose pa celebrar el so primer sínodu dende 1923. Fernández Conde, miembru del Conceyu Abiertu Pola Oficialidá, y que tuvo al frente de les dos grandes manifestaciones al favor de la oficialidá del asturianu que se fixeron l'añu pasáu, declara na entrevista, na que se declara escépticu énte'l debate real que pueda dase en sínodu, que "hai un gran sector de la diócesis y d'Asturies que nun tien conciencia de que tenemos una cultura propia" y pide qu'esta se dignifique al traviés de les mises n'asturianu. Fernández Conde declárase tamién "nacionalista", anque matizando que nun ye "separatista".