El Sacavera Sound torna a facer la maleta y viaxa pal conciyu de Ḷḷena

Celébrase esta fin de selmana baxo'l nome de 'Panorama de poétiques anfibies'. ÚLTIMA HORA: SUSPÉNDESE POR CUESTIONES AYENES A LA ORGANIZACIÓN Y APLÁZASE A FECHA NUEVA POR CONFIRMAR.

El Sacavera Soud, festival qu'axunta poesía, música, arte, folixa y psicodelia nacíu en La Pola Siero que la pasada edición tuvo Bimenes como sede, múdase a Ronzón, a El Palaciu, nel conciyu Ḷḷena. Al igual que l'añu pasáu, la organización pon una zona d'acampada pa los asistentes, que van poder disfrutar d'una güerta poétika.

La inauguración va tener llugar mañana a les 20.30 hores con Fran Pola y Poetes nes Ventanes. Darréu va celebrase la primer gran verbena poétika, pa finar na madrugada con una afterverbena con Quinta Esencia, J. García y Laura Villa.

El sábadu l'actividá va principiar a les 13 hores con Odón y Pola. Yá de tarde, a les 16 hores con Dani Stylo, va haber un enfrentamientu ente raperos y poetes, pa siguir darréu, al rodiu les 19.30 hores, col tradicional pasacaleyes.

La segunda gran verbena poétika va comenzar a les 22 hores y l'afterverbena, a les 00.30, nesta ocasión con Pites ensin Gallu, Abisal, Eli y Avanpsy. El domingu, día últimu del Sacavera Sound, un Breakfast Club a les 9 hores, con Felix Noise y Kresy, va abrir la xornada, que completa una actuación de Xaime Martínez a les 14 hores y el Chill Out Sacavera, a les 16 hores.