El Roue Waroch: una fin de selmana de respetu, intercambiu y folixa

Los díes 17, 18 y 19 de febreru, un cachín d’Asturies tuvo en Pleskob (Breizh) pa participar nel Roue Waroch, festival que dedicó esta edición al nuesu país. Clara Diez Márquez, de Menaxatruá, fixo una crónica del certame p’Asturies.com.

'UNA FIN DE SELMANA DE RESPETU, INTERCAMBIU Y FOLIXA'
 
La fin de selmana del 17, 18 y 19 de julio, un grupo de asturianos nos desplazamos a la población bretona de Pleskob convidaos pola organización del Roue Waroch, festival entamáu pola asociación Petra Neue que nesta ocasión dedícabase a Asturies per primer vegada nos sos 16 años de vida. El viaxe tuvo que facese n’autocar anque, nun primer momentu taba previstu desplazase en barcu pela Autopista del mar, pero col cuentu de lo del Costa Concordia la compañía LD Lines fixo un ‘parón téunicu’ de rigor y suspendióse'l serviciu del 16 (día de partida) al 29 de febreru y nun hubo barcu de sustitución.
 
El recibimientu sirvió pa escaecer tola incomodidá del viaxe en carretera hasta Breizh. Una xinta nel restorán del pueblu, d’unos 5.000 habitantes, sirvió pa garrar fuercies del llargu trayeutu. Tres la comida, la delegación asturiana treslladóse a Kergolen, un complexu de casines/hotel que sirvió de base. Mentes, otru grupín d’asturianos agospiámonos en Kerfuns, un pueblín a 1 quilómentru de Pleskob.

El tratu del festival hacia nosotros foi inmeyorable. Nel Roue Waroch hai 250 persones voluntaries que trabayen por que too salga bien. Y fáenlo de manera voluntaria, dende'l cocineru al direutor de programación, Fañch Loric. A les 18.30 hores, Menaxatruá Cuartetu encargámonos d’abrir el festival nunca carpa montada polos comerciantes de Pleskob nel centru del pueblu. Había unes 200 persones y montóse tamién chigre asturianu pa que la xente qu’acudiera al festival fora avezándose a la nuesa sidra. Dicíen les persones del públicu que-yos sonábamos como árabes o bereberes... Ye mui diferente pa ellos, pero valorárenlo enforma.

A les 21.30 hores tocó Tuenda y, depués, DRD en Chez Allano, el chigre'l pueblu. Ambiente brutal. La xente integradísima nos bailles y intentando falar con nós, anque más por xestos qu'otra cosa, porque conózse que somos dos países malos como la quina nos idiomes. Depués de los actos oficiales del festival, y como tolos díes, la fiesta siguió hasta altes hores de la madrugada.

El sábadu, María y Paulino fixeron la clase de baille pa 40 persones, con músicos en direutu (Menaxatruá, David Varela, Ambás, Diego Casado...). Casi toos y toes yeren baillarines de música bretón y pillaren los pasos a la primera. Hai que destacar que más d'unu y de dos baillaben con más xeitu que munchos d'equí… L’actividá foi un ésitu y durante tola xornada del sábadu, cuando tocó dalgún grupu asturianu, formóse una filera de 15 pareyes de baille, asturianos y bretones, que vista dende l'escenariu y tres del micro, emocionaba.

A les 18.30 hores abriéronse les puertes del polideportivu del pueblu al públicu y entamó el ‘apero-concert’, que nun ye otra cosa que ver los conciertos sentao nuna mesina con silles tomando un piscolabis. Entamó Tuenda, nun escenariu mui elegante, con una sonorización perfecta y un ambiente mui cálidu. Baillamos toles pieces baillables y, nes dances, participaron decenes de persones, porque ellos tienen un baille igual que se llama Rond de Saint Vicent, solo que xiren hacia la izquierda y nosotros hacia la derecha. Depués de más d'una selmana dando conciertos por toda Bretaña, Ambás llegó inclusu a presentar íntegramente en francés, siempre con ayuda del públicu, parte fundamental nos conciertos del grupu.

Vieux Farka Toure, de Malí, tocó dempués con una formación de trés músicos: el propiu Farka Touré, un batería y un baxu, qu’enllenaron l'escenariu de rítmu y color. La xente, como ye tán respetuosa, entamó'l conciertu sentáu, pero como yera imposible nun movese, a la metá, entamaren a animase y acabó tol mundu moviéndolo y dando palmes. Dio una lleción de guitarra, voz y rock and roll increyible. N’acabanado esti xefe, entamó Menaxatruá nun escenariu en mediu de les 2500 persones que había nesi momentu de públicu. La filera de bailladores, como yá comenté enantes, yera ablucante. Tanto ver lo que ye compartir, lo que ye compromisu y respetu pela so parte, como’l tocar depués de Vieux Farka Touré y enantes de Hamon Martin Quintet foron pa nós 30 minutos brutales.

Hamon Martin Quintet, como siempre, tuvieron perfectos. Perfectos pal baille, na execución, nel repertoriu. Ye una banda que, personalmente, adoro. Paécenme ún de los meyores grupos de Bretaña, cola peculiaridá de que canten en galó. Esti conciertu recuérdolo como dalgo especial, porque dibes baillando una gavotte y podíes ver na filera que cruzaba a los de La Bandina; y un pocu más allá a María y a Paulino. Llueu, siguíes observando y veíes a los de la clase de baille, que te saludaben; a los voluntarios... Al final, entre tanta xente, llegábes a sentite como en casa.

Tres esta actuación entamó La Bandina. ¡Qué conciertazu! El meyor que vi d'ellos y mira que soi fan de La Bandina. Tola xente qu’había nel polideportivo, miles de persones, baillando pese al calor que facía na sala. Y nos últimos cantares, 15 músicos de bagad tocando tres d'ellos. Épico. Foi épico dafechu. Na sala grande tovía quedaba un conciertu, pero como nun podíamos más de baillar y el calor yera agobiante, fuimos pa la sala onde taba'l chigre asturianu a ver a DRD.

El domingu, el día caberu del festival, entamó con una gran fabada amenizada por Menaxatruá que tuvo muncha afluencia de comensales tamién. Tamién hubo una charra sobre la situación del bretón y l'asturianu anguaño que foi mui interesante, con delles intervenciones. Mentes, nel concursu de duos, Pepín de Muñalénc y Fañch Loric, que compitieron xuntos, quedaren terceros. Amestaren a bailles bretones, melodíes asturianes, como la ḷḷixera de Payares. Asina, calificáronse pa la final Kan Ar Bob.

El llunes colamos en direición a Asturies, con una bandera bretona diciéndos ‘hasta la próxima’, depués de despedinos de los nuesos collacios de Pleskob. Estos díes en Bretaña sirvieron pa crear munchos vínculos d’amistá y de trabayu. Saldrán proyeutos interesantes d'amiestu de lo nueso y lo suyu, y ta claru que'l barcu va tener un tránsitu importante ente Pleskob y Uviéu. Yo yá tuviere nel festival l'añu pasau y recomiéndolo a tol mundu. Destacaríalo perriba inclusive del de Lorient y préstame que nun se quede namái no 'celta', permitiendo que, como esti añu, puedan convivir la cultura bretona, l’asturiana y la maliana.
 
Como integrante de Menaxatruá, y un poco faciendo de vocera de los músicos que participaren nel festival, quería dar les gracies a Petra Neue y a toos y caún de los voluntarios que faen posible’l Roue Waroch por valorar, respetar y daprender la nuesa cultura, asina como permitinos compartila con ellos.
 
Clara Diez Márquez, música y integrante de Menaxatruá Cuartetu.