El Rosal asciende a Primera Autonómica

|
Rosal ascensu a Primera Autonómica

El Sporting B complica la eliminatoria al encaxar un gol n'Almería nel minutu 92.

Tres ganar por 1-3 nel partíu d'ida del play-off d'ascensu a Primera Autonómica contra la Piloñesa, el Rosal afrontaba'l partíu de vuelta nel HFE Tensi I con tranquilidá pero con respetu al rival. Nun tardaríen los uvieínos en marcar, yá qu'Osky, nel minutu 13, consiguía abrir el marcador y firmar yá prauticamente'l saltu de categoría.

Lafuente, de penalti, enantes del descansu, y Pablín, nel 87, redondiaríen un resultáu de 3-0 que daba l'ascensu al Rosal, un club que sigue la filosofía del fútbol popular y que usa l'asturianu nel so día a día. El CD Ujo y el Miranda tamién consiguieron superar les sos eliminatories, polo que se sumen al grupu conformáu pol Lealtad B, al CD Langreo Eulalia y al Treviense, que lo fixeron de manera direuta.

Los sos puestos en Segunda Autonómica van ser cubiertos pol Atlético Camocha, el Llanes B, el Juventud Estadio, la SD Campomanes y l'Atlético Siero. La sesta plaza ye la del Glamour, club que se retiró de la competición.

Otra manera, l'Asturias ye equipu nuevu de Preferente tres superar al Manuel Rubio nel partíu de vuelta del play-off por 1-0 con gol de Rober nel minutu 33, poniendo asina un 2-1 global pa los de Blimea. Los equipos qu'algamaren l'ascensu direutu a la categoría que sigue a la Tercera División foron el Titánico y el Vallobín, mentes que descendieron a Primera Autonómica'l Muros, el Luarca CF y el Berrón.

Mareo, decisivo

Na segunda ronda pol ascensu a Segunda División B, el Sporting B llevó un golpe duru d'Andalucía tres recibir un gol nel minutu 92 tres quedar el balón francu al recién incoporáu al Almería B, el central marroquín Soufiane, tres pegar nel poste un centru llateral. Los de José Alberto López, que yá perdieran la so primer opción de xubir tres cayer col Olot, han de facese fuertes en Mareo si quieren pasar a la eliminatoria definitiva.

El choque va disputase'l domingu, a les 18.30 hores, nel Pepe Ortiz, choque que se prevé mui igualáu visto lo visto nel Estadio de los Juegos Mediterráneos. Pendiente d'esti partíu va siguir el Valdesoto, que xubiría a Tercera en casu d'un ascensu asturianu a Segunda B, posibilidá qu'anguaño sólo manexa'l Sporting B.

Contador Estadistiques