El rock sigue nos praos de la Llaboral

La segunda nueche del CrossRoad Festival nun defraudó a los más de 2.000 fans del blues y del rock que xubieron ayeri hasta los praos de la Llaboral pa ver a Lucky Peterson, El Vez, Blues Explosion, Presidents of the USA y a tamién a los Blasters, qu'a la fin nun pudieron tocar por complicaciones col tresporte aéreu.



Ensin dulda, l'actuación de El Vez foi lo más racial de la nueche. El sosias mexicanu d'Elvis Presley montó un show que se tuvo tol tiempu nel recursu al color, los disfraces y los esparabanes d'un cantante que da dalgo más que música, rescamplando nel so repertoriu la impagable versión spanglish de "In the Ghetto" d'Elvis.


Primero qu'elli abriere la nueche Lucky Peterson, maestru del blues que demostró tar en mui bona forma guitarrística, lo mesmo que la Teixi Band, qu'animó dellos de los intermedios. Sicasí, lo más interesante músicalmente de la nueche vieno cola actuación de los Presidents of the Usa, un grupu que quiciás nun concasare de mano col espíritu del festival por separtase un poco del camín del blues/rock pero que consiguió enganchar al públicu

L'actuación de los Stray Cats del añu pasáu va revivise esta nueche cola presencia del líder de la banda Lee Rocker, qu'abre la xornada de güei pa da-y pasu a Colin James y darréu, sobre les 22:30, Little Richard. Los Lobos son l'otru ganchu d'un cartel pa güei nel que tan tamién los Super Ratones, A-Bones y el veteranu Eero Raitinen. El CrossRoad Festival sigue cumpliendo con tolos pronósticos organizativos menos col de l'asistencia de públicu, que sigue siendo más baxa de lo esperao.