El Río Nalón baxa blancu per Uviéu al altor de Fuso

|
Esplumes El Río Nalón per Fuso

La Coordinadora Ecoloxista d'Asturies denunció la situación a la Confederación Hidrográfica del Cantábricu y al Gobiernu pa que lo investiguen.

Munches esplumes convirtieron en blancu El Río Nalón al so pasu per Uviéu, en concreto al altor de Fuso. Los ecoloxistes camienten que los arramaos podríen tener orixe orgánicu.

"Son demasiao habituales nos calces asturianos y débense, na nuesa opinión, al mal funcionamientu de munches depuradores, cuando non a la falta de les mesmes, y a los arramaos permitíos a dalgunes empreses, qu'emiten más de lo que tienen autorizáu", apunten. Un problema que se da n'otros munchos ríos asturianos cada poco.

Esti coleutivu espera que s'investigue l'orixe de les esplumes y esixe que "les alministraciones competentes entamen aiciones clares contundentes y efeutives p'acabar cola contaminación de los nuesos ríos, que nun deberíen siguir siendo cloaques por más tiempu".

 

Contador Estadistiques